Concello de Ames

Menú [Saltar]

Concello de Ames

[http://www.concellodeames.org]


Inicio Áreas Educación Actividades educativas


Actividades educativas

A Concellaría de Educación deseñou un variado programa de actividades para favorecer a conciliación da vida familiar e laboral de pais e nais, con xogos lúdicos e formativos para os cativos fóra do horario escolar.

Actividades educativas Monitores especializados en educación infantil atenden os nenos dende primeira hora da mañá, antes da súa entrada na gardería, e á volta creouse un servizo de recollida nos autobuses para trasladalos ás ludotecas. Nos períodos vacacionais realízanse multitude de actividades relacionais para que os rapaces teñan a oportunidade de permaneceren en contacto mentres os pais e nais acoden ao traballo.

Mediante campañas de animación á lectura quérese fomentar o pracer da adquisición de coñecemento a través dos contos e dos libros. Bibliopiscinas, presentacións de publicacións cos autores ou ilustradores e agasallos serven de reclamo para que os rapaces se acheguen ás salas de lectura das bibliotecas.

Programas lúdicos

Os programas lúdicos de Setembro, Nadal, Primavera e Xuño están destinados a nenos de 3 a 13 anos de idade. Desenvólvense en horario de 9:00 a 14:00 nas tempadas vacacionais. Participan arredor de 400 rapaces.

Escola de verán

Nos meses de xullo e agosto, unha media de 60 rapaces participan na Escola de verán. Está organizada en colaboración de Cooperactiva cultural, Don Bosco e Ágora Aberta. Cada monitor atende dez nenos e imparte actividades de lecer.

Bos días, cole

O programa denominado Bos días, cole é un servizo experimental creado para atender os nenos antes do inicio do colexio, a partir das 7:30, mentres os pais e nais acoden ao traballo. Na actualidade, préstase na Casa da Cultura de Milladoiro e no CEIP de Bertamiráns.

Tardes Divertidas

O servizo Tardes Divertidas é unha oferta educativa e de ocio promovida pola Administración local para permitir que os pais e nais que traballan durante a tarde teñan un lugar onde deixar aos seus fillos para que poidan estudar e xogar baixo o control duns monitores. Este programa vai dirixido aos nenos e nenas que cursan 2º ciclo de Educación Infantil e Educación Primaria. O horario do servizo é desde o remate do comedor escolar ata as 21:00 horas.

Campamentos de verán

Trinta mozos de 13 a 17 anos participaron nun campamento de verán na Devesa, en Lugo.

Escola municipal de pais e nais

O Concello de Ames contratou profesorado para impartir clase na Escola municipal de pais e nais, creada para atender a matrícula de adultos na modalidade non presencial do Instituto San Clemente. As clases de ensino regulado comezan no mes de novembro. Esta iniciativa cobre a demanda existente previa á creación dunha Escola permanente de adultos no IES Bertamiráns.

Campañas de animación á lectura

Os locais sociais das parroquias acollen cada mes unha campaña de animación á lectura organizada tematicamente arredor de datas significativas. As bibliopiscinas, presentacións e agasallos de libros son algunhas das actividades destinadas ao fomento da lectura. Todos os nenos de Ames recibiron no Nadal o libro "Os Bolechas van de viaxe", cunha carta que os convidaba a ir á biblioteca. Actualmente, está en proceso de creación unha mascota da biblioteca e unha programación estable de contacontos e visitas de escritores e ilustradores. Para os rapaces de 13 a 17 anos crearase unha sección con dvds, películas, música, internet e cómic.

Actividades extraescolares

En colaboración co IES de Ames, elaboraranse unidades didácticas sobre datas significativas e impartiranse obradoiros de educación sexual, seguridade viaria e de saúde para tratar temas como anorexia e bulimia

Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925