Concello de Ames

Menú [Saltar]

Concello de Ames

[http://www.concellodeames.org]


Inicio Relaciónate Avisos


Avisos

Unha unidade móbil do Centro de Transfusión de Galicia atenderá as doazóns de sangue os días 21 e 22 de febreiro en Bertamiráns

[20-02-2019] A Concellaría de Sanidade, Servizos Sociais e Igualdade informa á veciñanza amesá de que unha unidade móbil do Centro de Transfusión de Galicia (CTG) acudirá este xoves, 21 de febreiro, e mailo venres, 22 de febreiro, ata Bertamiráns. A unidade móbil de doazón estará aparcada na avenida da Maía, diante da praza da Maía, en horario de 15.30 a 21.00 horas. Lémbrase que se deberá acudir en posesión da tarxeta de doante ou do DNI ou un documento identificativo similar.

Abre o prazo de inscrición para participar no programa de conciliación Primavera Lúdica

[20-02-2019] O Concello de Ames, a través da Concellaría de Educación e Cultura, abre hoxe o prazo de inscrición para participar no programa de conciliación laboral e familiar Primavera Lúdica. O servizo desenvolverase os días 15, 16, 17 e 22 de abril, coincidindo coas vacacións escolares de Semana Santa, durante os que se organizarán varias actividades educativas e culturais destinadas aos cativos e cativas da casa. A través desta iniciativa buscase facilitarlle aos pais e nais a conciliación da súa vida laboral e familiar durante as vacacións escolares. O prazo para presentar as solicitudes de inscrición remata o vindeiro 1 de marzo. Premendo nos enlaces que están a túa dereita, baixo o apartado de descargas, poderás obter as bases dos programas lúdicos, o impreso de inscrición e os prezos do servizo.

Cursos preparatorios das probas Celga 1, 2, 3 e 4

[19-02-2019] A Secretaría Xeral de Política Lingüística convoca cursos preparatorios das probas Celga 1, 2, 3 e 4, nas modalidades presencial (niveis 2, 3 e 4) e de teleformación (niveis 1, 3 e 4). Os cursos terán lugar nos meses de abril e maio. O prazo de inscrición e de 20 días naturais a partir de mañá 20 de febreiro de 2019.

Programación de Ames Radio na semana do 18 ao 24 de febreiro

[18-02-2019] Ames Radio fai pública a súa programación da semana do 18 ao 24 de febreiro. Premendo no enlace que está a túa dereita, baixo o apartado de descargas, poderás consultar a programación completa.

Xa podes reservar praza para participar na excursión literaria “Viaxando con Rosalía” o vindeiro 23 de febreiro

[15-02-2019] O sábado, 23 de febreiro, realizarase unha excursión poética que incluirá unha visita á Casa de Rosalía na Tarroeira en Ortoño, lugar onde a autora pasou os seus primeiros anos de vida. Alén da parroquia de Ortoño, as persoas participantes tamén visitarán Bastavales, en Brión, onde se atopa a igrexa cuxas campás protagonizaron un dos versos máis soados da autora. Así mesmo, a excursión tamén incluirá unha visita á Casa Museo de Rosalía en Padrón, máis coñecida como "Casa da Matanza". Durante a excursión, a escritora amesá e estudosa da figura de Rosalía de Castro, María López Sández, achegaranos á vida da homenaxeada e á súa obra.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925