Concello de Ames

Menú [Saltar]

Concello de Ames

[http://www.concellodeames.org]


Inicio Relaciónate Avisos


Avisos

Participa na xornada sobre mobilidade sustentable en estratexias urbanas que se enmarca dentro do plan Impulsa Ames

[17-04-2018] O Concello de Ames está organizando para o vindeiro mércores, 25 de abril, unha xornada sobre mobilidade sustentable en estratexias urbanas, que se enmarca dentro do plan Impulsa Ames. Este programa está incluído dentro da convocatoria europea de Estratexias de Desenvolvemento Urbano Sustentable e Integrado (DUSI), cofinanciando polo programa europeo FEDER de Crecemento Sustentable 2014-2020. Impulsa Ames parte dun estudo de necesidades en Bertamiráns e no Milladoiro, dado que a mellora dos espazos urbanos son o principal obxectivo da DUSI. Deste xeito, a través deste plan preténdese facer de Ames un municipio integrador, ben comunicado, sustentable, accesible e no que fique a mocidade facilitándolle ferramentas culturais e de lecer atractivas e fomentando o emprego.

As formacións musicais de Ames xa se poden inscribir no Censo de Artistas municipal

[12-04-2018] O Concello de Ames, a través da Concellaría de Educación e Cultura, vén de crear un Censo de Artistas, co que busca crear unha base de datos actualizada de todos os grupos de música amesáns, de maneira que nun futuro se poidan organizar actividades ou eventos nos que estes participen. Para poder inscribirse, os grupos deberán ter polo menos a metade dos seus compoñentes empadroados no Concello de Ames. O rexistro no Censo será, así mesmo, un requisito indispensable á hora de empregar A Factoría, o novo espazo municipal de locais de ensaio. Premendo no enlace que está a túa dereita, baixo o apartado de descargas, poderás obter o formulario de inscrición e a autorización obrigatoria para os menores de idade.

Aberto o prazo de inscrición para as actividades que organiza a Aula de informática do Milladoiro de abril a xullo

[09-04-2018] A Aula de Informática do Milladoiro abre hoxe o prazo de inscrición para as súas actividades dos meses de abril, maio, xuño e comezos de xullo. A programación comezará co obradoiro “Elaboración de documentos con LibreOffice Writer”, no mes de abril, e finalizará en xullo coa realización do curso de mecanografía para mozas e mozos. Polo medio, tamén se desenvolverá o obradoiro “Compras en liña: aprende a comprar de maneira segura”, en maio, e o curso de mecanografía destinado a crianzas, en xuño. O prazo de inscrición destas actividades, que son gratuítas, permanecerá aberto ata que se cubran a totalidade das prazas. A túa dereita, baixo o apartado de descargas, poderás obter as solicitudes de inscrición para cada un dos cursos.

Suspéndese a andaina solidaria organizada por SOGAPS para este domingo

[05-04-2018] A andaina solidaria, organizada pola asociación Solidariedade Galega co Pobo Saharauí (SOGAPS) para este 8 de abril, queda suspendida debido ás condicións meteorolóxicas previstas para esa data. Desta maneira, a realización da camiñada adíase ata o vindeiro 13 de abril.

Listaxe definitiva de admitidas/os no programa Primavera Lúdica 2018

[09-03-2018] O Concello de Ames informa de que xa está exposta a lista definitiva de admitidas/os no programa Primavera Lúdica. Premendo nos enlaces que están a túa dereita, baixo o apartado de descargas, poderás consultar as listas de Bertamiráns e Milladoiro. Debido a Lei de Protección de Datos non se poden publicar datos de carácter persoal nesta lista, pero pódese comprobar se unha rapaza ou rapaz está admitido a través do número de rexistro que figura nesta lista e na copia do impreso de inscrición de cada usuaria/o. As listas tamén se pode consultar nas oficinas do departamento de Educación, situadas no Pazo da Peregrina, nas portas de entrada da Casa do Concello e nas oficinas municipais do Milladoiro.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925