Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas A Panadaría...


A Panadaría presentará a gala dos Premios Youtubeir@s, cuxo prazo de inscrición para participantes remata o 15 de marzo

[12-03-2018] A compañía teatral A Panadaría presentará a gala da segunda edición dos Premios Youtubeir@s o vindeiro 20 de abril. Deste xeito, as actrices Areta Bolado, Noelia Castro e Ailén Kendelman subirán ese día ao escenario do Teatro Colón para conducir a entrega dos premios do Proxecto Youtubeir@s, iniciativa organizada polos servizos de normalización lingüística dos concellos da Baña, Ames, Carballo, Ourense, Pontevedra, Ribadeo, Santiago, Teo e O Grove, polas tres universidades e pola Deputación da Coruña.

O obxectivo do Proxecto Youtubeir@s é promover e darlle visibilidade ao uso do galego a través da rede social de vídeos máis grande do mercado global: YouTube. A iniciativa pretende fomentar así a creatividade con temas propios e xerar referentes en galego dun novo axente con gran repercusión social dende o mundo dixital como son os/as youtubeiros/as. O público poderá acceder de forma gratuíta á gala, tras reservar previamente as súas entradas a través desta ligazón http://www.teatrocolon.es/es/evento/entrega-de-premios-youtubeirs-coa-panadaria/

Prazo aberto ata o 15 de marzo
Os premios Youtubeir@s, centrados na promoción do uso do galego en Youtube, divídense en cinco categorías: video-facermos, vídeo-opinarmos, canle, creatividade, eficiencia comunicativa, calidade técnica, calidade lingüística e o premio do público. A estes cinco apartados poden concorrer todas as persoas maiores de 14 anos a través de vídeos de opinión ou videotitoriais autoproducidos en galego subidos a Youtube de xeito independente ou nunha canle. Todas as pezas participantes teñen que estar publicadas con data posterior ao 28 de abril de 2017 sen restricións de privacidade e cos cancelos #youtubeiras #youtubeiros na descrición.

En total, o certame entregará 5.500 euros en premios. As bases ao completo pódense consultar no web www.youtubeiras.gal e todas as persoas interesadas aínda teñen tempo de presentarse aos galardóns nas súas cinco categorías ata o vindeiro xoves 15 de marzo, día en que remata o prazo de inscrición aos Premios Youtubeir@s. Nesta segunda edición inclúese o galardón do público, chamado #propostayoutubeira dotado con 500 euros. Tamén ata o 15 de marzo o público pode votar as propostas a través do Facebook para que o xurado escolla entre os cinco vídeos máis votados nesta categoría. Os vídeos participantes ata o momento pódense ver nestas ligazóns: https://www.youtube.com/watch?v=wZ64JQNk_YM&list=PLClP96GGteLRgxk-Jz6mmUXb4WFNu3pE_ (vídeo-facermos) e https://www.youtube.com/watch?v=DCEn89vf71I&list=PLClP96GGteLSjtkNM3Ynj0l7oMGIXAr1d&index=3 (vídeo-opinarmos).

Nas dúas edicións de Yotubeir@s, a que arrincou o proxecto en 2017 e a que está en marcha neste 2018, o proxecto está a conseguir os seus obxectivos ao incrementar notablemente o número de vídeos en galego. Ademais, deste aumento da presenza de galego en Youtube, cómpre destacar a riqueza temática acadada nas pezas audiovisuais, que van dende a crítica de cine aos temas de actualidade, pasando por titoriais con trucos e consellos no ámbito da tecnoloxía, a mecánica ou a cociña. Un terceiro aspecto a subliñar é a implicación de diferentes asociacións e colectivos coas súas creacións audiovisuais como tamén a participación de persoas de idades moi diversas. Deste xeito, o galego espállase polo YouTube e acompaña as novas linguaxes e modos de comunicación da chamada xeración milennial.

A Panadaría
Fundada no ano 2013, A Panadaría converteuse nos últimos anos nunha das compañías referentes no panorama escénico galego. Co seu primeiro espectáculo Pan Pan! , a formación constituída por Noelia Castro, Areta Bolado e Ailén Kendelman obtivo o premio Xuventude Crea 2013 e o Premio da Crítica Galicia 2015. A partir dese espectáculo, desenvolveron dúas montaxes máis, Panamericana e Elisa e Marcela. Nesta última produción, a compañía fixo o primeiro achegamento escénico a Elisa e Marcela, as dúas mulleres que casaron en 1901 na Coruña. A Panadaría, ademais, ten presentado diversas entregas de premios como os Premios da Música Martin Códax.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925