Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas A Corporación...


A Corporación municipal puxo en coñecemento do Ministerio de Fomento a situación da N-550 ó seu paso polo Milladoiro

[12-11-2018] Unha representación da Corporación municipal de Ames mantivo esta mañá unha xuntanza en Madrid co Director xeral de Estradas do Ministerio de Fomento, Javier Herrero Lizano. A reunión serviu para dar traslado da situación actual da N-550 ao seu paso polo Milladoiro e estudar a posibilidade de desenvolver medidas a curto prazo para paliar o elevado tránsito de vehículos pola avenida Rosalía de Castro. Neste senso, estudarase a posibilidade de limitar tamén o paso polo centro urbano de vehículos pesados de menos de 30 toneladas, ademais de instalar unha serie de paneis informativos que indiquen o tempo de percorrido tanto pola N-550 como por vías alternativas, o que se prevé disuada aos condutores do seu paso polo centro do Milladoiro.

Por segunda vez este ano, unha representación da Corporación municipal do Concello de Ames asistiu a unha xuntanza en Madrid co Director xeral de Estradas do Ministerio de Fomento. A esta reunión asistiron o concelleiro de Urbanismo, Obras Públicas e Servizos Básicos, Blas García, e mailo concelleiro do grupo municipal popular, Javier Olmo, coa ausencia do voceiro do grupo municipal Ames Novo, Quique Costas, por motivos persoais.

Durante a mañá, avanzouse na medida adoptada o pasado mes de outubro pola Demarcación de Estradas do Estado en Galicia, na que se acordou desviar o tránsito de vehículos de máis de 30 toneladas polo tramo urbano do Milladoiro. Así, a representación municipal trasladou a posibilidade de limitar tamén o paso polo centro urbano de vehículos pesados con MMA inferior a 30 toneladas, que se desviarían dende a SC-20 (á altura da gasolinera), cara a autoestrada AG-56 e polo corredor AC-522, ata a glorieta das Galanas, situada na N-550. Dende o Ministerio de Fomento amosáronse receptivos a esta solicitude, co compromiso de estudar a súa viabilidade.

Asemade, na xuntanza tamén se falou da posibilidade de instalar unha serie de paneis indicadores na zona da Rocha e nas Galanas, en ambos casos antes de entrar no Milladoiro, para informar dos tempos de paso dos vehículos pola autovía AG-56 e polo centro de Milladoiro. Deste xeito, reduciríase de xeito salientable o tráfico que discorre pola avenida de Rosalía de Castro, e de cara ao futuro, permitiría reducir a dous carrís de circulación dita avenida coa consecuente humanización desta rúa do Milladoiro. Neste senso tamén se abordou a posibilidade de construír unha rotonda a dobre altura ó lado da gasolineira da Rocha, o que tamén solucionaría os problemas de tráfico derivados do polígono industrial Novo Milladoiro, e os accesos desde Travesía do Porto e Muíño Vello

Pola súa banda, a corporación municipal trasladou a necesidade de elaborar un estudo de posibilidades e solucións no que non se descarte ningunha medida que poida mellorar a situación e axude a humanizar a zona. Asemade, tendo en conta que moitas das medidas necesarias deberían tomarse no límite municipal de Santiago e en zona pertencente ao Concello de Teo, propúxose a creación dunha comisión de seguimento formada por representantes municipais e de Fomento. A creación deste grupo ten como obxectivo realizar un seguimento constante do avance das medidas a través de reunións periódicas, co fin de humanizar a rúa Rosalía de Castro que asegurar o avance das medidas.

O representante de Fomento tamén se comprometeu a trasladar este mesmo tema na reunión que manterá mañá co Delegado de Estradas en Galicia, e seguir estudando a situación para continuar planificando posibles solucións a curto prazo.


O concelleiro de Urbanismo, Obras Públicas e Servizos Básicos, Blas García, agradeceu que “xa se tomase unha medida, que supón a primeira disposición que se toma en canto á N-550 no seu paso polo Milladoiro nos últimos anos, se ben confiamos en que non se quede nun feito illado e se leven a cabo máis. Temos confianza de que a xuntanza de hoxe sexa positiva e teña repercusión para poder humanizar a rúa Rosalía de Castro”. Ademais, trasladoulle a Javier Herrero a necesidade de que a situación se resolva o antes posible, posto que concellos máis pequenos con unha problemática menor xa se tomaron medidas neste sentido, como son os municipios de Padrón, Caldas de Reis ou Ordes.

Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925