Ayuntamiento de Ames

Menú [Saltar]

Ayuntamiento de Ames

[http://www.concellodeames.org]


Inicio Ames digital Noticias


Noticias

Abre o prazo de inscrición para a Foliada con Apego do vindeiro 2 de marzo

[20-02-2018] Unha nova Foliada con Apego terá lugar o próximo venres, 2 de marzo, no Pazo da Peregrina de Bertamiráns ás 18:00 horas. A actividade, que estará dirixida tanto a familias con crianzas como a calquera persoa á que lle guste a música tradicional, busca construír unha espazo de socialización en galego onde poder compartir, cantar, bailar e aprender cancións tradicionais galegas. Para participar é preciso inscribirse previamente a través do enderezo de correo electrónico normalizacion@concellodeames.gal, indicando o número de participantes, o seu nome e apelido e un teléfono de contacto. O prazo de inscrición permanecerá aberto ata o 1 de marzo.

A compañía Teatro do Morcego representará este venres no Milladoiro a obra House desaforado

[20-02-2018] A programación teatral do Concello de Ames continúa este venres, 23 de febreiro, coa representación da obra teatral “House desaforado”. Dirixida a un público adulto, a peza aborda desde o humor unha situación dramática: o protagonista dubida acerca do que debería facer cando a súa nai está posuída polo demo e o seu pai é o home máis triste do mundo. A obra, que está protagonizada polo actor Celso Parada, é un monólogo do multipremiado dramaturgo canadense Daniel Malcvor. A representación de “House desaforado” terá lugar na Casa da Cultura do Milladoiro, ás 21:00 horas. As entradas xa están dispoñibles na Billeteira electrónica. Así mesmo, podéndose mercar tamén anticipadamente nas Casas da Cultura do Milladoiro e Bertamiráns, de luns a venres, en horario de 10:00h a 13:00 horas. O 10% das entradas resérvanse, como é habitual, para vender de xeito presencial desde unha hora antes do comezo do espectáculo.

O Concello de Ames, SOS Animalia e as clínicas veterinarias poñen en marcha un programa de captura, esterilización e solta de gatos para o control das colonias felinas

[20-02-2018] O concelleiro de Medio Ambiente e Desenvolvemento Sostible, Javier García, achegouse esta mañá, xunto a dúas das integrantes de SOS Animalia, a dúas zonas onde existen colonias felinas dentro do núcleo urbano de Bertamiráns. O motivo foi a posta en marcha, en colaboración coas clínicas veterinarias de Ames, do proxecto CES (captura, esterilización e solta) para controlar de xeito ético as colonias felinas dentro dos ámbitos urbanos. Este proxecto leva funcionando arredor de tres semanas. Durante este tempo esterilizáronse e castráronse uns 18 animais das colonias incluídas neste programa. A idea e incrementar o número de colonias nas que se está traballando. Trátase de controlar de xeito ético e responsable as colonias de gatos nas zonas urbanas para contribuír ao benestar destes animais e á convivencia cidadá.

Este martes remata o prazo para candidatar vídeos alleos que optarán ao Premio do Público #PropostaYoutubeira

[19-02-2018] Baixo o lema “Mostra @ Youtubeir@ que levas dentro”, o proxecto Youtubeir@s busca promover, por segundo ano consecutivo, o uso do galego na plataforma de vídeos Youtube coa organización dun certame, campañas de difusión e cursos de formación. Como novidade deste ano sobresae o Premio do Público, que se presenta co nome de #PropostaYoutubeira. O prazo para a presentación de propostas de vídeos candidatos ao premio remata este martes, 20 de febreiro. As propostas deberán ser realizadas a través do perfil Youtubeir@s en Facebook cun simple comentario que inclúa o cancelo #PropostaYoutubeira. Con todas as propostas recibidas, crearase un álbum con todos os vídeos, de maneira que as persoas interesadas poidan votar polo seu vídeo favorito cun “gústame”. As votacións realizarase entre o 25 de febreiro e o 15 de marzo. O prazo para inscribir os vídeos e as canles para o resto de Premios Youtubeir@s rematará tamén o 15 de marzo. Os premios serán entregados o 20 de abril de 2018 nun acto público na Coruña, no que o xurado dará a coñecer os gañadores.

A veciñanza das parroquias de Agrón, Ames, Biduído, Covas, Lens e Trasmonte poderá participar na convocatoria de axudas para a rehabilitación de vivendas no ámbito dos camiños xacobeos

[19-02-2018] O Concello de Ames, a través da Concellaría de Promoción Económica, achega información acerca da orde de subvencións para as actuacións de rehabilitación de edificios e vivendas no ámbito da área de rehabilitación integral (ARI) dos Camiños de Santiago. A esta liña de axudas poderá optar a veciñanza das parroquias de Agrón, Covas Lens, Trasmonte, Ames e Biduído. No caso das dúas últimas, a veciñanza só poderá solicitar as subvencións no caso de que os inmobles se atopen no trazado do Camiño Fisterra-Muxía e no Camiño Portugués. O prazo de presentación de solicitudes, que xa está aberto, pechará o 31 de outubro de 2018. Premendo no enlace que está a túa dereita, baixo o apartado de descargas, poderás obter un folleto informativo sobre esta convocatoria de axudas.


Aviso legal | Accesibilidad | RSS

© Ayuntamiento de Ames
Praza do Concello, 2, Bertamiráns. Tel: 981 883 002 - Fax: 981 883 925