Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

O Concello de Ames solicítalle a Xunta de Galicia á mellora da seguridade viaria na contorna do CEIP da Maía e do IES de Ames

[22-05-2019] O Concello de Ames vén de enviarlle hoxe, 22 de maio, un escrito á Consellaría de Infraestruturas e Vivenda da Xunta de Galicia, no que se solicita unha mellora da seguridade viaria na contorna do CEIP da Maía e do IES de Ames. Deste xeito, dáse traslado das queixas realizadas pola comunidade educativa, e en especial polas ANPAS do CEIP A Maía e do IES de Ames, a raíz do accidente acontecido no paso de peóns que hai nas inmediacións destes centros educativos (estrada AC – 544, punto quilométrico 1), de Bertamiráns, para que se adopten as medidas que se estiven oportunas por parte da Administración autonómica. Esta mesma solicitude xa foi feita en varias ocasións.

O club de atletismo Millaraio acada cinco medallas no campionato provincial Xogade

[22-05-2019] O pasado domingo, 12 de maio, celebrouse na Pobra do Caramiñal a final provincial sub10 e sub12 individual e sub14 de combinadas da competición de atletismo en pista Xogade. Os atletas do club de atletismo Millaraio acadaron cinco medallas neste campionato: ouro para Alejandro Jiménez en Tetrathlon sub14 (80m, 80m valos, lonxitude e peso); Laura Sanz en 60m sub12; e Daniel García en lanzamento de peso sub10; e prata para David Moreno e María Estévez en lanzamento de pelota sub12.

As nenas e nenos de Ames converten o municipio nunha vila poética atravesada por camiños de versos

[22-05-2019] O alumnado de todos os centros de ensino públicos de educación infantil e primaria de Ames, coa colaboración do Servizo de Normalización Lingüística municipal, están a traballar ao longo do mes de maio para converter Ames nunha vila poética. Para iso, os nenos e nenas colocaron arredor de duascentas laxas ilustradas con versos en lingua galega en diferentes espazos concorridos do concello. Estes versos foron escolmados e ilustrados polo alumnado amesá e algúns deles mesmo creados pola rapazada.

A Xunta de Goberno Local aproba participar na primeira fase do Plan único de concellos POS+ Adicional 1/2019 dotado con 834.460 euros

[21-05-2019] A Xunta de Goberno Local aprobou o pasado 16 de maio a participación do Concello de Ames no Plan único de concellos POS+ Adicional 1/2019. A achega provincial asignada ao Concello de Ames no POS+ Adicional 1/2019 é de 834.460,91 euros. A maior parte desta contía, que ascende a 777.415,69 euros, dedicarase a sufragar os proxectos incluídos no POS complementario de 2019 (construción duns novos vestiarios no campo de fútbol do Milladoiro; execución de novas sendas peonís de Sisalde a Agro do Muíño e de Outeiro a Costoia; e pavimentación de camiños nos lugares de Raíces, Tarrío, Ventosa e Sura). O importe restante de 57.045,22 euros dedicarase a outros proxectos.

A vida baixo a auga será a protagonista da última sesión de VéV organizada esta fin de semana pola Aula da Natureza e a OMIX de Ames

[21-05-2019] A Aula da Natureza de Ames pon fin á súa programación de primavera este sábado, 25 de maio, coa última sesión do bloque Vida baixo a auga, que nesta ocasión xirará en torno ao mergullo con botellas. A actividade, organizada en colaboración coa OMIX, estará destinada a mozos e mozas de 13 a 18 anos. Durante a xornada, os/as participantes recibirán unha charla explicativa sobre o mergullo e o material necesario para realizalo, coñecementos que porán en práctica nunha inmersión que terá lugar na praia de Cabío. A actividade será supervisada polos instrutores do Club Palmira Scuba, e contará con servizo de autobús dende Bertamiráns e Milladoiro. Para ocupar algunha das prazas que quedan libres será necesario inscribirse na actividade antes das 14.00h do venres enviando a ficha de inscrición cuberta ao enderezo auladanatureza@concellodeames.gal.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925