Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Master class de squash na nova pista de squash Borja Golán

[23-03-2019] Este venres, 22 de marzo, a Concellaría de Deportes organizou un acto público no anexo do pavillón polideportivo de Bertamiráns para promocionar o deporte do squash na nova pista de squash "Borja Golán Santín". A actividade consistiu nun partido demostración que disputaron o propio Borja Golán (profesional do squash desde 2002, bicampión de Europa e dezaseis veces campión de España), Arón Astray Gómez (medalla de bronce no campionato europeo de seleccións nacionais sub-17 no 2018) e Pascal Gómez Valois (campión galego absoluto no 2016). Tras este partido de demostración, Borja Golán impartiu unha pequena master class a un grupo de alumnos/as.

Participa na actividade “Vente de finde, natureza e surf na praia de Razo”

[23-03-2019] As concellarías de Medio Ambiente e Mocidade organizan unha nova edición do programa “Vente de finde, natureza e surf na praia de Razo”, que este ano se realizará entre os días 26 e 28 de abril. O prazo de inscrición comeza este mércores, 27 de marzo, e nela poderán anotarse un total de 30 mozos/as entre os 13 e os 18 anos. Para que se realice dita actividade será necesario acadar un mínimo de 15 inscritos. O custe da actividade é de 80 euros, que inclúe os gastos de desprazamento, o custe das actividades que se van desenvolver e o aloxamento en réxime de pensión completa. A cea da primeira noite non está incluída no prezo, polo que deberá levarse da casa. O prazo de inscrición estará aberto ata o 5 de abril. Premendo nos enlaces que están a túa dereita, baixo o apartado de descargas, poderás obter as bases e o impreso de inscrición nesta actividade.

Os nenos e nenas do EIM O Bosque visitan a unha granxa bovina para achegarse ao mundo animal

[22-03-2019] As cativas e cativos de 2 e 3 anos da escola infantil municipal O Bosque visitaron este xoves, 21 de marzo, a granxa Isaura Rivas y J. Villaverde S.C. O obxectivo da visita foi coñecer de cerca a vida dos animais que viven nesta granxa da Escravitude. Durante a excursión, o alumnado puido ver como funciona unha granxa de leite e como é a vida das vacas e tenreiros que alí viven. Por último, os nenos e nenas coñeceron ao burriño da granxa, que lles permitiu subirse nas súas costas e dar pequenos paseos.

A Fundación Meniños busca familias que colaboren co programa de adopcións especiais

[22-03-2019] O Concello de Ames, a través da Concellaría de Servizos Sociais, colabora un ano máis coa Fundación Meniños na difusión do seu programa de adopcións especiais. Baixo o lema “Construamos unha familia xuntos. Adopta!” búscase informar e animar ás familias interesadas sobre a adopción de nenos, nenas e adolescentes tutelados pola Xunta de Galicia que, por presentar necesidades especiais, teñen unha maior dificultade para atopar unha familia. A este grupo pertencen adolescentes, grupos de tres ou máis irmáns e/ou irmás, nenos/as con discapacidade ou enfermidade. As persoas interesadas poden enviar un correo electrónico ao enderezo adopcion.especial.t1@meninos.org ou mediante os teléfonos 981 26 99 55 ou 678 75 23 93.Tamén se pode entrar na páxina web www.meninos.org.

O XI Certame Artístico-Literario Intercentros céntrase en como será Galicia no ano 2050

[22-03-2019] O Concello de Ames, a través do Servizo de Normalización Lingüística, convoca a décimo primeira edición do Certame Artístico-Literario Intercentros. Na convocatoria poderán participar as nenas e nenos dos cursos de 3º, 4º, 5º e 6º de primaria escolarizados en centros amesáns. Os traballos, relatos ou poemas ilustrados poderán presentarse de xeito individual ou por parellas ata o 3 de maio, e deberan tratar sobre como lles gustaría aos rapaces e rapazas que fose Galicia no ano 2050. Os premios entregaranse, coincidindo co acto de celebración do Día das Letras Galegas, o 16 de maio no Milladoiro. Premendo no enlace que está a túa dereita, baixo o apartado de descargas, poderás obter as bases do certame.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925