Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Máis de 1.500 persoas visitaron a exposición O Milladoiro, o que está por ver

[16-05-2007] Este domingo pechou a exposición informativa organizada pola alcaldía para dar a coñecer como será O Milladoiro á volta duns cinco anos. Segundo os datos facilitados por este departamento, a mostra -composta por paneis, maquetas e audiovisuais- visitárona 1.540 persoas, ademais de medios de comunicación e profesionais do mundo inmobiliario e da promoción de novas construcións. O Milladoiro, o que está por ver estivo envolta na polémica xa desde antes da súa apertura por mor da denuncia presentada polo PP perante a Xunta Electoral de Zona na que se reclamaba a suspensión da exposición polas súas "inevitables connotacións electorais ou partidistas". A Xunta Electoral desestimou a petición cualificando a exposición como "unha actuación ordinaria do Concello" no campo da información urbanística e, ademais, "sen capacidade de influencia directa ou indirecta na intención de voto pola súa natureza e contido".

Noite movida para a Policía Local

[16-05-2007] Nas últimas horas do martes e as primeiras do mércores producíronse dúas incidencias que requiriron a presenza da Policía Municipal no Milladoiro. A primeira delas está relacionada cun posible caso de violencia de xénero que se saldou coa detención dun home de mediana idade que, presuntamente, agrediu á súa compañeira. A segunda incidencia da noite tivo por protagonista unha moza de 17 anos que vagaba pola rúa da Cruxa na procura dun lugar onde durmir. O presunto agresor foille entregado á Garda Civil para que continúe coas dilixencias do caso, mentres que a rapaza foi trasladada pola Policía Autonómica a un centro de acollida.

O proxecto Amorodo, protagonista do San Cidre

[16-05-2007] O San Cidre é o santo patrón dos labregos e, ademais, tamén do Concello de Rois. Este martes celebrouse alí o día grande das festas e a primeira Feira do produto caseiro. Como única estrela da feira, os alimentos producidos ao abeiro do Proxecto Amorodo, no que participan Ames, Rois e Dodro. No seu posto comercializáronse alimentos frescos e transformados provenientes de 20 pequenas explotacións.

O Concello dá acceso a internet sen fíos nas casas da Cultura

[15-05-2007] Desde esta semana os centros socioculturais do Milladoiro e de Bertamiráns dispoñen de cadanseu punto de acceso público a internet, gracias á instalación de dúas redes wi-fi que permitirán navegar de balde dentro e fóra destes dous edificios. A Concellaría de Cultura e Deportes quere desta maneira incrementar as posibilidades que xa ofertan as aulas de informática de cara a que os usuarios e usuarias poidan acceder a internet cos seus portátiles durante as 24 horas do día.

A CIG e traballadoras de Limpiezas Ames maniféstanse diante do Concello

[15-05-2007] "¡Queremos cobrar e non mendigar!"."¡Empresa culpable, alcalde responsable!"."¡Alcalde, escoita, a empresa está en loita!". Esas foron as tres consignas básicas que se puideron escoitar esta mañá na praza do Concello entre o son atronador de tambores. A Federación de Servizos da CIG e varias traballadoras da empresa Limpiezas Ames reclamaban deste xeito que se lle dea unha solución á súa situación. Levan dous meses sen cobrar e cargan contra a alcaldía malia que a empresaria percibiu as cantidades que o Concello lle adebedaba polos servizos prestados logo de descontar o que a Seguridade Social reclamaba para si.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925