Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

30 alumnos participaron na xornada de deportes de raqueta

[26-02-2007] Un adestrador de tenis, dous deportistas de alto nivel de bádminton e dous monitores de tenis de mesa actuaron como mestres na xornada de deportes de raqueta que se desenvolveu o pasado sábado no Pavillón Polideportivo do Milladoiro. A actividade, encamiñada a que os afeccionados amienses a estes deportes melloren a súa técnica estivo organizada pola Concellaría de Cultura e Deportes.

Hoxe hai baile para maiores en Bertamiráns

[25-02-2007] Non sexas tímido e achégate a bailar connosco. Deste xeito convida a Concellaría de Sanidade e Servizos Sociais a todos os veciños e veciñas de Ames para que acudan á Casa da Cultura de Bertamiráns hoxe, ás 18:30 da tarde a participar no baile de maiores. O dúo musical Eva e Camilo amenizará o baile. Na organización colabora Agora Aberta.

As Amaianas presentan o seu disco na Radio Galega

[24-02-2007] Son unha ducia de mozas ás que lles gusta a música tradicional e que, ademais, están dotadas de voces prodixiosas. O Concello editoulles hai uns meses o seu primeiro disco e agora toca promocionalo. Un dos lugares máis axeitados é a radio e se é dentro dun programa especializado, pois mellor. Esta tarde a partir das catro as Amaianas presentan no programa da emisora autonómica Lume na palleira o seu traballo e tamén a súa capacidade para cantar ao vivo diante dos micrófonos.

A multipremiada "No es tan fácil" chega hoxe á Bertamiráns

[23-02-2007] Dous homes analizan todos os xeitos posibles de deixar unha relación sen facerlle dano á parella, chegando sempre á conclusión de que "non é tan fácil". Esta é a base do argumento de Non é tan fácil, un texto orixinal de Paco Mir, premiado co Max das artes escénicas, que hoxe porá en escena na Casa da Cultura de Bertamiráns a Compañía Mala Sombra Teatro. A representación terá lugar ás 21 horas e enmárcase dentro do programa Venres Teatrais que organiza a Concellaría de Cultura en colaboración co IGAEM. A entrada custa 2 euros e medio. Os estudiantes, os xubilados e os menores de 12 anos só pagarán 1,25 euros.

Ames fala en Tarragona de incendios e de protección civil

[23-02-2007] Tarragona é un dos polos industriais máis fortes de Catalunya e tamén do Estado. Ao estar ao pé do Mediterráneo dáse a circunstancia de que o seu porto tamén é dos máis transitados, cun alto índice anual de atraques de buques que transportan hidrocarburos e outras mercadorías perigosas. Quizais son estas razóns as que levaron ao Concello desa cidade a organizar as primeiras Xornadas nacionais sobre Planificación e Implantación de Plans de Protección Civil. Aínda que os riscos químicos e a seguridade marítima centran as xornadas que se desenvolven desde onte, tamén se falou de incendios forestais. O alcalde de Ames, Carlos Fernández, participou como ponente nunha mesa redonda ao respecto da protección das urbanizacións ante catástrofes deste tipo.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925