Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

O Concello súmase ás reclamación dos veciños dun novo instituto para o Milladoiro

[05-11-2005] Estes días é noticia a petición da Plataforma polos centros educativos do Milladoiro de que a Xunta inclúa nos orzamentos do ano que vén un instituto para Ames. Os veciños mesmo ameazan con botarse á rúa para que esta infraestrutura sexa unha realidade. Neste sentido a concelleira de educación, Pilar Candocia, expresou esta mañá o apoio do Concello a esta reclamación ao tempo que fixo unha chamada á tranquilidade dado que os orzamentos autonómicos aínda non están pechados. A responsable do departamento de educación tamén sinalou que nestes momentos se está negociando coa consellaría a ampliación e a redistribución dos recursos educativos de Ames. Segundo Candocia "a negociación vai por bo camiño pero non descartamos sumarnos ás protestas veciñais se finalmente non se atenden as necesidades de centros que ten o Milladoiro".

Saen a concurso obras do saneamento de Insua e da Ponte Nova

[05-11-2005] O Diario Oficial de Galicia de hoxe publica os anuncios de contratación de dúas obras relacionadas coa mellora do tratamento de augas residuais. Unha delas é a do saneamento de Insua e a outra é a do saneamento da Ponte Nova. Ámbalas obras saen a concurso por separado e están orzamentadas en case 140.000 euros.

A Concellaría de Educación e a Asociación Follas Novas de Ames recuperan a tradición do Samaín

[04-11-2005] Os nenos de seis a doce anos do Concello de Ames poderán afondar na festa do Samaín a través do traballo que sobre esta tradición elaborou a Concellaría de Educación en colaboración coa Asociación Cultural Follas Novas. A profesora María Xesús Pena creou seis unidades didácticas para cada un dos cursos de primaria. Os contos, as adiviñas, os problemas matemáticos, os xogos de palabras, os poemas, os debuxos para colorear e o resto das propostas de traballo que se recollen nestes cadernos teñen como protagonista principal á cabaza, o símbolo máis importante desta festa de tradición celta. Con este traballo de recuperación e difusión do Samaín, Ames dá un paso máis no asentamento dos sinais de identidade propia fronte aos costumes alleos impostos pola globalización.

Esta tarde quedará restablecido o sinal de televisión en Agrón

[04-11-2005] Varios lugares de Agrón permanecen sen televisión desde antonte, logo de que o temporal tirara abaixo a torreta de reemisores situada no campo de fútbol desta parroquia. O Concello e maila empresa encargada do mantemento dos repetidores decidiron como solución de urxencia a colocación dun soporte provisorio así como a reposición dos paneis estragados. Espérase que a última hora da tarde de hoxe o servizo estea restablecido agás nos lugares de Gasamáns e do Galiñeiro. O mal tempo tamén deixou a zona sen cobertura de internet sen fíos.

Luz verde ao proxecto de urbanización do sector "Alto do Vento"

[03-11-2005] Na última Xunta de Goberno local o Concello avanzou en dous trámites de cara á urbanización do sector denominado "Alto do Vento". En primeiro lugar aprobouse a escritura de constitución da xunta de compensación da que forman parte a empresa promotora, outros propietarios e mailo alcalde en representación do Concello. A continuación tamén se lle deu o visto e prace ao proxecto inicial de urbanización destes terreos situados no lugar de Ventosa, pertencente á parroquia de Cobas.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925