Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

A Madalena organiza o curso cunha nova axenda

[06-09-2006] A escola infantil municipal da Madalena comezou o curso cun novo material de apoio para un mellor desenvolvemento e axilización da relación entre o centro e os pais e nais. Trátase dunha axenda organizadora que ofrece toda a información precisa para estes nenos e nenas de 0 a 1 anos. Desde a Concellaría de Educación "consideramos que é a mellor maneira de identificarnos co que facemos" e que os nenos e nenas coñezan a realidade do seu entorno, afirma a concelleira Pilar Candocia.

A Escola de Adultos axúdache a sacar o título da ESO

[06-09-2006] As persoas maiores de 18 anos que desexen obter o Título de Graduado en Educación Secundaria Obrigatoria (ESO) poden facelo a través da Escola Municipal de Adultos que o Concello de Ames pon en marcha cada ano ao comezo do curso escolar. Esta iniciativa ofrece un servizo de titoría que axuda aos alumnos e ás alumnas a preparar as distintas materias das que se terán que examinar. As clases impartiranse no IES de Bertamiráns e os exames realizaranse no Instituto San Clemente de Santiago. Cada alumno ten a oportunidade de realizar dous cursos por ano académico.

O Concello vai campar neste nadal

[06-09-2006] Un ano máis Ames prepara o nadal. Para iso, a Concellaría de Desenvolvemento Local anunciou que as luces volverán alumar as rúas e prazas do Concello durante estas datas. 80 arcadas, 19 letreiros de boas festas e diversas iluminacións en puntos do municipio axudarán a dar cor e ambiente festivo xa desde mediados de novembro. As empresas que desexen participar neste concurso poderán facelo presentando a solicitude e a documentación ata o día 23 de setembro.

O lume prende nas Pateiras

[06-09-2006] Un incendio queimou esta tarde algo máis dunha hectárea de monte na zona das Pateiras, preto do límite entre Bertamiráns e Covas. Segundo parece, o lume iniciouse cara ás tres da tarde nunha zona arborada con piñeiros e maleza. Malia a espectacularidade da columna de fume os servizos de extinción non tiveron maior problema para controlar o avance do incendio. Un helicóptero da Xunta, tres motobombas e outras tantas cuadrillas foron máis que suficientes para rematar as lapas.

Créase unha brigada para restauración de contornos degradados

[05-09-2006] Unha nova brigada forestal que se encargará da restauración de contornos naturais degradados traballa desde onte no noso concello. A brigada foi creada mediante o Programa de Cooperación coas Entidades Locais, dependente da Consellería de Traballo. Aínda que a Brigada foi solicitada especificamente para traballar no río Sar, a concellaría de Medio Ambiente dará os pasos necesarios para que tamén poida dedicarse á rexeneración do monte queimado.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925