Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

A Policía Local e a Garda Civil desbaratan unha banda acusada de 40 roubos

[15-01-2007] Axentes da Garda Civil de Milladoiro e de Brión e a Policía Local de Ames, levaron a cabo unha operación conxunta nas últimas semanas que se saldou coa detención de tres mozos veciños de Ames aos que se lles imputan corenta feitos delituosos entre roubos, furtos e substracións. A operación que deu como resultado as detencións tamén serviu para recuperar parte dos obxectos substraídos. Os corpos de seguridade cren que os detidos e os seus posibles cómplices -dous deles xa imputados- poderían ser autores doutros sete roubos en grado de tentativa. Os axentes non deron aínda por finalizado o operativo, xa que se sospeita de que podería haber máis persoas implicadas nos feitos, algunhas delas menores de idade.

O gañador do ano pasado resultou lider na primeira xornada da Liga de Chave

[15-01-2007] Cumplironse todas as previsións e o Catoira A e o Bar Martínez, primeiro e segundo clasificado na pasada edición, impuxeronse na primeira xornada da II Liga de Inverno de Chave que comenzou a xogarse o pasado sábado no Pavillón Polideportivo do Milladoiro. Preto de 100 persoas, entre público e xogadores, acudiron a este evento deportivo que organiza a Concellaría de Cultura e Deportes.

A limpeza viaria comeza con exercicios de quecemento

[15-01-2007] Hoxe é o día en que arranca a limpeza viaria no concello de Ames. Durante toda a mañá moitos veciños puideron ver máquinas percorrendo as rúas aquí e acolá, máis para tomar contacto con elas que para facer unha limpeza efectiva. De feito, nesta primeira xornada varios técnicos da central de Urbaser en Santiago estiveron dándolles aos operarios que traballarán en Ames algúns consellos ao respecto do manexo de todos os aparellos. Estes primeiros días son para collerlle o punto á maquinaria e para coñecer ben todos os recunchos do concello. Porén, espérase que no prazo aproximado dunha semana o dispositivo de limpeza funcione a pleno rendemento.

O premio ao mellor espectáculo infantil FETEGA 2006 está hoxe en Bertamiráns

[14-01-2007] Efi é unha pequena mosca efémera que acaba de nacer. A súa nai, antes de despedirse dela e deixar que emprenda o seu voo solitario, anímaa a que goce da vida sen que lle importe o tempo senón o que fai con el. Este sería o punto de partida de A viaxe de Efi, a historia que a Compañía Imaxina Machina contará hoxe sobre o escenario da Casa da Cultura de Bertamiráns. A representación terá lugar hoxe, domingo 14 de xaneiro, ás 17 horas e enmárcase dentro do programa Domingos Infantís que a Concellaría de Cultura organiza coa intención de que as familias gocen xuntas do teatro. A entrada custa 2 euros e medio. Os estudiantes, os xubilados e os menores de 12 anos só pagarán 1,25 euros.

O Concello inviste 40.000 euros no acondicionamento viario de Alto do Vento

[14-01-2007] A Concellaría de Planificación de Obras e Desenvolvemento Parroquial acaba de iniciar dúas obras no lugar de Alto do Vento, en Covas. A primeira delas é o acondicionamento dun camiño que lle dá servizo a dez vivendas e a segunda é a preparación dun tramo duns cen metros da ruta xacobea procedente de Fisterra. En total van investirse algo máis de 40.000 euros no arranxo destes dous viarios que os veciños levaban reclamando varios anos. Malia dispor de orzamento e de dous proxectos detallados, o Concello tivo que agardar á autorización das obras por parte da sociedade de xestión do Plan Xacobeo que, ademais, será a encargada de empedrar o anaco de Camiño fisterrán.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925