Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Comeza a II Liga de Inverno de Chave

[13-01-2007] Sete equipos, un máis que na pasada edición, participarán durante 14 xornadas na II Liga de Inverno de Chave que se celebrará a partir de hoxe no Pavillón Polideportivo do Milladoiro todos os sábados ás seis e media da tarde ata o día 15 de abril. Este segundo torneo de inverno consolida a crecente aceptación que o tradicional xogo da chave ten no Concello. A organización corre a cargo da Concellaría de Cultura e Deportes.

O primeiro pleno do ano abordará a clausura do vertedoiro de Piñeiro

[13-01-2007] Para este sábado ás 12 horas todos os membros da corporación están convocados ao primeiro pleno ordinario do ano. Malia que tocaría celebralo o día de Reis, hai algúns meses que se decidiu tamén en pleno adiar ata o seguinte sábado hábil as sesións que cadrasen en festivo. Deixando a un lado as cuestións organizativas, cómpre destacar o calado dalgunhas cuestións que se van tocar na sesión. A orde do día de asuntos para deliberación e acordo componse de catro puntos: a aprobación das actas anteriores, a aprobación definitiva da RPT, o convenio para saldar de mútuo acordo as débedas co anterior asesor xurídico do Concello e, sobre todo, a solicitude de financiamento a Medio Ambiente para acometer o selado do vertedoiro de Chan dos Montes, en Piñeiro.

O Concello solicitará a Xunta a financiación para o selado do vertedoiro de Piñeiro

[13-01-2007] O primeiro pleno do ano, celebrado hoxe no Concello de Ames aprobou solicitarlle á Xunta de Galicia que financie a "adecuación, clausura e selado do vertedoiro Chan dos Montes", situado no lugar de Espiño, na parroquia de Piñeiro. Ademais, na mesma sesión aprobouse a RPT do Concello e o convenio para saldar de mutuo acordo as débedas co anterior asesor xurídico. O pleno resolveuse en algo menos de dúas horas coa aprobación por unanimidade de todos os puntos da orde do día, agás o da aprobación da relación de postos que saiu adiante cos votos a favor do equipo de goberno e a abstención da oposición. Porén, o tema do vertedoiro de Piñeiro suscitou un encendido debate entre o grupo de goberno e a oposición.

A limpeza viaria e o punto limpo empezarán a funcionar o luns

[12-01-2007] Urbaser empezará a prestar o servizo de limpeza das rúas de Ames o próximo luns, día 15 de xaneiro. Ese día tamén abrirá ao público o punto limpo situado no parque empresarial do Milladoiro para que os veciños e veciñas do concello depositen nel aqueles residuos que non poden deixarse nos colectores convencionais. A Concellaría de Servizos Básicos organizou dous actos de presentación do novo servizo: hoxe venres entre as 12 e as 15 horas na praza de Manuel Murguía do Milladoiro e o sábado de 16:30 a 19:30 na praza do Concello, en Bertamiráns.

Monte Vivo programa para xaneiro unha conferencia e dúas visitas prácticas

[12-01-2007] Unha charla-debate na que se informará sobre a experiencia que está levando a cabo na ordenación dos montes a Cooperativa de Explotación Comunitaria da Estrada Terra Monte Cabalar, e dúas visitas: unha á Sociedade Agraria de Transformación FUNGOCERCA, en Melide, e outra ao Centro de Experimentación e Formación Agroforestal de Lourizán, en Pontevedra, son as actividades que ten previsto realizar durante este mes de xaneiro a Concellaría de Medio Ambiente a través do programa Monte Vivo. A concellaría organiza estas actividades coa intención de ofrecerlles aos propietarios dos montes a información suficiente para que poidan tomar, cos coñecementos necesarios, as decisións que vexan oportunas á hora de ordenar os seus terreos forestais.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925