Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Ames inaugura a súa piscina cuberta

[20-05-2006] Chegou o momento de ver o que se esconde dentro do moderno edificio de formigón que se ergue na rúa do Camiño Novo. A piscina cuberta municipal A Telleira inaugúrase hoxe ás 12'00 da mañá nun acto ao que están chamadas asociacións, persoeiros e representantes da Xunta e máis da Deputación. Salvador Fernández Moreda, Presidente da Deputación Provincial, Milagros Lantes Delegada Provincial de Deportes, e Ramón Brigos, Subdirector Xeral para o Deporte confirmaron a súa asistencia. Será unha cerimonia sinxela, con intervencións breves de benvida ao novo servizo que lle darán paso a un percorrido polas instalacións. A partir do luns haberá unha semana de portas abertas e o primeiro de xuño, todos á auga.

A SER na Festa do Roxón

[20-05-2006] Aproveitando a celebración da II Festa do Roxón, a Cadena SER retrasmite hoxe o seu programa Comarcas desde Bertamiráns. Desde as doce do mediodía o equipo que dirixe Manel Pardo estará no Pazo da Peregrina para entrevistar a responsables da festa. Ademais tamén estarán no programa algúns dos premiados no III Certame Literario de Ames e o Obradoiro de Música Tradicional que interpretará algunhas pezas do seu repertorio. O alcalde, Carlos A. Fernández e o Tenente Alcalde, Xosé M. Fernández serán entrevistados por Manel Pardo a partir da unha do mediodía.

Días de Mar levou a 30 nenos e nenas do concello á Aguieira

[19-05-2006] 30 nenos e nenas do concello de entre cinco e sete anos, acompañados de catro monitores, viaxaron ata a praia da Aguieira co obxectivo de estudar as mareas e os restos de arribazón que deixan nos areiais. A excursión formou parte do programa Días de mar que organiza a Concellaría de Medio Ambiente a través da Aula da Natureza.

Sete empresas concursan polos amarres dos colectores do lixo

[19-05-2006] A Concellaría de Servizos Básicos, Parques e Xardíns encargou hai algún tempo un estudo para coñecer de que maneira se podía mellorar a ordenación das illas de colectores de lixo. Nese informe aconsellábase como prioritaria a colocación de sistemas de suxeición dos depósitos verdes e amarelos. Por iso, a Xunta de Goberno Local aprobou sacar a concurso o subministro de 1000 suxeitacolectores por un importe de 183.000 euros. Este martes abríronse as plicas coas ofertas económicas presentadas por sete empresas.

Unha visita de conto

[18-05-2006] É como o que sae no conto..., dixeron os alumnos e alumnas de 1º Curso de Primaria de Ventín que visitaron hoxe a Casa do Concello seguindo a ruta que fan os Bolechas no conto A vaca da Amaía. A excursión fixera xa unha primeira parada na Casa de Rosalía en Ortoño e, despois de ser recibidos no Concello polo alcalde e por varios concelleiros, partiu rumbo á Igrexa de Santa Minia, as Torres de Brión, as instalacións de Feiraco, a Ponte Maceira, a praia de Tapia e o Muiño de Vilar. A ruta dos Bolechas pola Amaía será repetida mañá polos nenos e as nenas do 2º Curso de Primaria de Ventín.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925