Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Unha xogadora do Bertamiráns FC formará parte do equipo do Arcea-Adames no IV Reto pola integración

[14-12-2006] Unha futbolista da sección feminina do Bertamiráns FC xogará co equipo do Arcea-Adames no IV Reto pola integración: Trofeo de fútbol que se desenvolverá no Pavillón Polideportivo do Milladoiro o vindeiro sábado, día 16 de decembro, ás 17:30. No torneo participarán membros da Asociación de Discapacitados Intelectuais Arcea Adames e estrelas do fútbol. Este encontro, organizado pola Concellaría de Cultura e Deportes e pola Asociación Arcea-Adames, ten como obxectivo principal dar a coñecer as condicións nas que desenvolven a súa vida os discapacitados intelectuais cara a súa total integración na sociedade. A entrada é libre e gratuíta, aínda que haberá unha Fila 0 para que todas aquelas persoas que o desexen poidan aportar a súa contribución económica a Arcea-Adames.

Avanza a instalación das ancoraxes dos colectores do lixo

[14-12-2006] Durante estes días estase acelerando o paso para deixar lista a primeira fase do amarrado dos colectores do lixo que hai en Ames. A empresa ourensá Luis Soto Rebollo resultou a adxudicataria do contrato de subministración e instalación destes dispositivos, que xa vai moi avanzada na zona do Milladoiro. En total van colocarse 1.000 abrazadeiras metálicas pensados para ordear as illas de colectores tanto na zona urbana como na rural e, sobre todo, para garantir a seguridade viaria.

Ames presenta a Guía de empresas na I Xornada do emprendedor compostelán

[13-12-2006] A guía de empresas en Internet que desde hai un ano está a elaborar o Concello de Ames foi presentada onte na I Xornada do emprendedor compostelán. A intención da Concellaría de Desenvolvemento Local, Turismo e Emprego, encargada da posta en marcha da guía, era a de "testala" entre os mozos e mozas que acudiron a este encontro previamente á súa presentación oficial que terá lugar antes de que remate este ano.

A EIM A Madalena fai dous anos

[13-12-2006] As nenas e nenos da escola infantil municipal do Milladoiro están de aniversario: dous aniños. Non é que todos fagan os anos o mesmo día e que todos e todas teñan a mesma idade. É que hoxe se cumpre o segundo aniversario da apertura da escola con xestión íntegra do Concello. Día de celebración no que houbo, como non podía ser doutro xeito, torta con candea incluída. O novo titular da Concellaría de Educación foi o encargado de apagala.

As primeiras probas teóricas para as catro prazas da policía reúnen 18 aspirantes

[13-12-2006] Cada vez queda menos tempo para que remate o proceso selectivo de catro novos policías locais. Esta mañá desenvolveuse no centro de usos múltiples de Aldea Nova a primeira proba teórica que deberán superar os candidatos e candidatas que optan a estas prazas pertencentes á convocatoria de emprego público do 2005. Porén, dos 18 que se presentaron hoxe, só 12 superaron o exame, que estivo centrado na súa totalidade na toponimia e a xeografía de Ames.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925