Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

O Concello quere que o campo de Bertamiráns sexa de herba artificial

[28-07-2006] De novo abondaron pouco máis de dez minutos para resolver os asuntos que se levaban a un pleno de carácter extraordinario. Entre a unha e a unha e dez deste mediodía, a corporación deulle o visto e prace por unanimidade á incorporación de Ames ao plan de campos de herba artificial da Deputación. Ademais tamén se aprobaron dúas alegacións presentadas ao regulamento dos comedores escolares que pasarán a formar parte do seu articulado.

Preto de 50 voluntarios colaboran coa III Festa da Mocidade

[28-07-2006] Ataviados coa camiseta e a gorra identificativas da Oficina do Voluntariado, preto de medio cento de voluntarios percorrerán o sábado e o domingo as rúas do Milladoiro co obxectivo de informar sobre os actos programados para a festa, entregar o Pasaporte III Festa da Mocidade , que permitirá participar nas actividades, obter puntos cambiables por agasallos e colaborar con calquera eventualidade que se poida producir. Ademais, a organización conta coa presenza permanente dunha ambulancia, varios efectivos de Protección Civil de Brión e un servizo de vixilancia privada para os concertos.

Amessan despídese ata setembro

[27-07-2006] Amessan, o programa de promoción da saúde que por terceiro ano consecutivo puxo en marcha a Concellaría de Sanidade e Servizos Sociais, despídese ata setembro. Preto de 400 persoas maiores participaron nas clases de ximnasia terapeútica e expresión músico tradicional, nos obradoiros de cociña san, memoria e expresión a través das mans e nos bailes e nas excursións que se desenvolveron durante todo o curso. Moitos dos participantes están xa desexando que comecen de novo as actividades.

Aumenta a demanda para os comedores escolares

[27-07-2006] Preto de 400 nenos e nenas, case 100 máis que o ano pasado, acolleranse o vindeiro curso ao servizo de comedores escolares que ofrece a Concellaría de Educación en Bertamiráns, Ventín e Aldea Nova. O incremento da demanda provocou que o departamento responsable dos comedores previra poñer un límite de prazas para poder garantir un servizo de calidade. Todas as solicitudes foron admitidas.

A Policía Local estrea coche

[27-07-2006] O edificio administrativo de San Caetano congregou esta mañá a representantes de 17 concellos galegos aos que se lles entregou oficialmente cadanseu vehículo destinado á Policía Municipal. En total saíron da Xunta oito motos e nove coches rotulados e preparados para entrar en servizo inmediatamente. Para Ames veu un destes novos coches patrulla, valorados en 18.000 euros cada un. Desta cantidade, o Concello tivo que poñer tan só 3.000 euros para dispoñer dun vehículo do trinque que se suma aos outros tres dos que xa dispón o parque móbil da garda municipal.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925