Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

O Caja Rural-Burunda imponse no I Trofeo de Ciclismo Concello de Ames

[17-07-2006] 150 corredores, entre as que se encontraban as mellores promesas do ciclismo estatal, participaron no I Trofeo de Ciclismo Concello de Ames, unha das probas máis importantes de todas as que se desenvolven en Galicia dentro do calendario deste ano. O Caja Rural-Burunda foi o equipo gañador e un dos seus ciclistas, José Vicente Toribio Alcolea, acadou o premio ao gañador absoluto. O Club de Ciclismo B. Oliveira organizou este evento e a Concellaría de Cultura e Deportes foi quen se encargou de patrocinalo.

O concurso A Ceo Aberto promove a igualdade á hora de viaxar

[16-07-2006] Promover a ruptura das barreiras á hora de viaxar e amosar que voar está ao alcance de todos é o obxectivo do concurso A Ceo Aberto que organiza a Asociación de Discapacitados Intelectuais Arcea Adames e patrocina a empresa Aerolíneas Air Berlín. Poderán participar neste concurso todos os discapacitados intelectuais que desexen expresar por calquera medio artístico que son e que significan para eles as viaxes. A Consellería de Vicepresidencia da Igualdade e o Benestar Social e as Concellarías de Servizos Sociais e Educación de Ames colaboran con esta iniciativa.

Os mellores do ciclismo estatal tomarán a saída en Bertamiráns este domingo

[15-07-2006] O I Trofeo de Ciclismo Concello de Ames promete ser unha das probas máis importantes de todas as que se van desenvolver en Galicia dentro do calendario deste ano. Dúas razóns fan desta carreira algo especial: o nivel dos participantes e o seu número. De feito, en Bertamiráns xuntarase case 150 corredores amateur e sub-23 e, entre eles, as mellores promesas do ciclismo estatal.

A Feira de da Cultura e Música Tradicional nace con vocación de futuro

[15-07-2006] "Esta feira nace coa vontade de converterse nunha das citas culturais importantes do verán en Galicia". Estas palabras do concelleiro de Cultura de Ames, Xosé M. Fernández López, definen o espírito co que esta mañá se inauguraba no Pazo da Peregrina a Feira da Cultura e Música Tradicional. Á inauguración tamén asistiu Milagros Lantes, delegada provincial da Consellaría de Cultura e Deportes, Alexandre Cadarso, director da Asociación Follas Novas, Carlos A. Fernández, alcalde de Ames e a concelleira de Turismo, Emprego e Desenvolvemento Local, Obdulia Vila.

¿Sabes que é a pegada ecolóxica?

[14-07-2006] ¿Pechas a billa da auga cando lavas os dentes?, ¿dúchaste ou báñaste?, ¿apagas a luz cando saes do teu cuarto? Estas son algunhas das preguntas ás que os nenos e as nenas que asisten á Escola de Verán de Bertamiráns deberán responder para avaliar a pegada ecolóxica que o seu comportamento deixa no medio. Baixo o título de Reciclaxe en vivo, as concellarías de Educación e Medio Ambiente organizan para mañá, venres 14 de xuño, ás 10 da mañá no IES de Bertamiráns, unha xornada de educación ambiental na que os rapaces e as rapazas avaliarán a súa conduta ambiental e recibirán información sobre hábitos de reciclaxe.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925