Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Ames colabora co comercio Xusto

[17-12-2005] Os veciños de Ames poderán colaborar co desenvolvemento das poboacións máis desfavorecidas ao tempo que mercan os seus agasallos de Nadal. As Concellarías de Mocidade e Desenvolvemento Local, en colaboración coa Coordinadora Galega de ONGs para O Desenvolvemento e o Fondo de Cooperación e Solidariedade, organiza unha xornada de comercio xusto que se desenvolverá na Praza do Concello desde as catro e media ata as oito e media da tarde. Paralelamente e a través de obradoiros lúdicos, amosaránselles aos máis pequenos as desigualdades económicas existentes no mundo.

Ames escríbelle aos Reis Magos en galego

[16-12-2005] "Queridos Reis Magos: eu chámome...." Este ano os nenos de Ames escribiranlle aos Reis Magos en galego. 3000 cartas-sobre serán distribuídas para axudarlles aos rapaces e ás rapazas do concello a redactar as súas peticións de agasallos no noso idioma. Os reis contestarán persoalmente a cada unha das peticións, por iso é importante que os enderezos dos remitentes se poñan completos e clariños. A campaña que leva o título de "Aos reis magos, en galego", é unha iniciativa da Concellaría de Cultura.

A praza do concello convértese nun plató

[15-12-2005] Seguro, tranquilo, civilizado. Así é Os Anxos, unha urbanización de chalés fóra da cidade. Alí viven familias formadas por matrimonios novos, con fillos pequenos ou adolescentes. Pertencen á clase media. Son guapos, fan deporte, preocúpanse pola ecoloxía e pola alimentación san. En fin, Os Anxos é, en aparencia, un paraíso da seguridade, un lugar onde todo semella correcto e nada sae da norma...

Parabéns para a Escola Infantil do Milladoiro no seu primeiro aniversario

[15-12-2005] Con 22 educadoras, 103 nenos e unha lista de agarda de 70 prazas, a Escola Infantil A Madalena fai un ano de vida. Para celebralo, a concelleira de Educación, Pilar Candocia, reuniuse coas traballadoras do centro. Na foto de familia ¡todas contentas!, e non é para menos porque como declarou a concelleira "en só un ano e co esforzo de todas, a escola do Milladoiro pasou de ser un centro asistencial a ser un centro educativo".

Ames ten dúas novas concelleiras

[14-12-2005] Mercedes Vidal Baamonde, do Bloque Nacionalista Galego, e Carme Verde Leboráns, do Partido Popular, tomaron posesión do seu cargo de conselleiras no Pleno extraordinario celebrado na tarde de onte. Mercedes Vidal será a nova concelleira de Medio Ambiente, en substitución de Francisco Carracedo que renunciara ao seu cargo despois de ser nomeado Xerente da Cidade da Cultura. Carme Verde substitúe a Carlos Rivas que tamén renunciara ao seu cargo por motivos persoais.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925