Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Adxudícanse as obras de saneamento no núcleo de Susavila de Carballo por un importe de 62.016,95 euros

[16-04-2019] A Xunta de Goberno Local vén de aprobar a adxudicación do proxecto que recolle as obras de saneamento no núcleo de Susavila de Carballo, na parroquia de Trasmonte, por un importe de 62.016,95 euros, IVE incluído. Estas actuacións, que foron adxudicadas á empresa Excavaciones José Varela Iglesias, S.L., están financiadas polo Plan complementario do Plan único de Concellos POS+ 2018.

Aberto o prazo de inscrición para o obradoiro de cantos de berce “Arrolos de salitre”

[15-04-2019] O vindeiro 26 de abril, a Casa da Cultura do Milladoiro enchese de arrolos e cantos de berce da man de Faia Díaz e Guillerme Fernández a través da actividade “Arrolos de salitre”. Este obradoiro, que estará orientado tanto a familias con crianzas entre os 0 e os 3 anos como a futuras mamás e papás, contará con dúas sesións, unha ás 17:00h e outra ás 18:00h. A iniciativa busca que as persoas asistentes aprendan novos cantos de berce para transmitirlles afecto ás crianzas a través da lingua e da música. A actividade é gratuíta e as prazas outorgaranse por orde de inscrición. Para inscribirse é necesario enviar un correo ao enderezo electrónico normalizacion@concellodeames.gal, indicando o nome e os apelidos das persoas participantes, a súa idade, a sesión escollida e un teléfono de contacto.

Máis de 160 nenos/as exploran toda a súa creatividade na Primavera Lúdica de Ames

[15-04-2019] Hoxe comeza unha nova edición do programa Primavera Lúdica, a través da que o Concello de Ames procura axudar ás familias a compatibilizar a vida laboral e familiar ofrecendo actividades matinais ás crianzas do segundo ciclo de infantil e de educación primaria, que nesta edición están destinadas a potenciar a creatividade e a autonomía dos cativos e cativas. O programa, que conta con servizo de Bos días e comedor, desenvolvese os días 15, 16, 17 e 22 de abril. Nesta edición participan un total de 161 rapaces e rapazas, dos que 93 acoden ao Milladoiro e 68 a Bertamiráns.

Comeza o I Trofeo de Tenis Concello de Ames

[15-04-2019] As instalacións do Real Aeroclub de Santiago, situadas na Ameixenda, acollen ao longo desta semana a primeira edición do Trofeo de Tenis Concello de Ames. Os partidos comezan hoxe a partir das 16.30h, e desenvólvense ata o domingo 21, cando teñen lugar as finais infantil, alevín, veteranos junior +35 e absoluta. O torneo está dividido nas modalidades federada e open non competitivo. As categorías federadas divídense en benxamín, alevín, infantil, cadete, absoluto e veteranos + 35; mentres que o open vai dirixido a nenos/as de 6 a 10 anos e divídese en mini-tenis, 3/4 pista e pista completa. No total inscribironse 71 persoas federadas e 20 non federadas.

Cincocentos oitenta deportistas déronse cita no Campionato de Judo das categorías alevín e infantil celebrado no Milladoiro

[15-04-2019] O pavillón municipal do Milladoiro acolleu durante o último fin de semana de marzo o Campionato de Judo organizado polo Compostela Judo Club, no que participaron deportistas das categorías alevín e infantil. A proba, encadrada na Liga Galicia Rias Altas, contou coa asistencia dun total de 400 deportistas e 23 adestradores/as, membros de varias escolas de Ames, Santiago de Compostela e Teo, así como de diversos clubs galegos. Con motivo desta competición, tamén tivo lugar unha concentración da selección galega de judo, na que participaron 180 deportistas e 22 adestradores.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925