Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Pilar Cernuda fala hoxe no Milladoiro sobre a violencia contra as mulleres

[17-11-2006] A violencia contra as mulleres é o título da conferencia que a xornalista Pilar Cernuda pronunciará hoxe venres, ás 20:30 horas na Casa da Cultura do Milladoiro. A actividade, na que colabora a Concellaría de Cultura de Ames, enmárcase dentro do programa Xornalismo Século XXI que levan a cabo conxuntamente a Deputación Provincial da Coruña e Caixanova. A entrada é libre e gratuíta.

Preséntase o plan de acción da Axenda 21 Local de Ames

[17-11-2006] Nos últimos meses as empresas DS Consultores e Devalar fixeron un traballo concienzudo xunto cos participantes no foro social da Axenda 21 Local para plasmar no papel unha serie de propostas que sirvan para lograr un concello máis sostible no futuro. O informe resultante foille presentado onte á comisión de validación, da que forman parte os grupos da corporación e técnicos municipais. O documento foi aceptado logo de introducirlle pequenas precisións técnicas. Agora terá que ser refrendado polo Pleno para que os dez compromisos pola sostenibilidade reflectidos no papel se vaian executando co Concello como principal impulsor.

Desenvolvemento Local anima o mercadiño dos sábados con espectáculos de rúa

[17-11-2006] Mercar no mercadiño de Bertamiráns será moito máis divertido a partir de agora. A Concellaría de Desenvolvemento Local programa para todos os sábados ata o 16 de decembro teatro, música, circo e toda unha serie de espectáculos encamiñados a facer máis entretida a tarde de compras. As actividades desenvolveranse na praza do Concello e nas rúas que contornan o mercadiño. Os espectáculos realizaranse entre as cinco e as sete da tarde. O primeiro deles correrá a cargo da Compañía Viravolta que interpretará Vida, Crimes e Prisión de Toribio de Mañón.

Conclúe a primeira fase de acondicionamento da travesía de Covas

[17-11-2006] Quen cruce Covas estes días seguramente se decataría de que houbo un cambio importante, sobre todo no tramo que vai desde Ponte Loureiros ata o desvío de Capeáns. É algo menos dun quilómetro de percorrido no que o Concello acaba de investir 30.000 euros destinados integramente á renovación do firme. Xunto coa recente instalación dun alumeado público tamén novo, remata a primeira fase da travesía de Covas que o Concello ten previsto continuar ata o cruce do Lombao.

Hoxe proxéctase "Aillados", un documental sobre a época en que a Illa de San Simón foi cadea

[16-11-2006] Durante a guerra civil e nos primeiros anos do franquismo, a Illa de San Simón foi cadea e campo de concentración. Miles de persoas estiveron presas neste lugar que se atopa fronte ao Concello de Redondela. Hoxe, no marco das Xornadas da Memoria Histórica en Ames que organiza a Concellaría de Cultura, en colaboración coa Consellaría de Cultura e Deportes da Xunta, proxéctase o documental Aillados que recolle testemuñas de presos, familiares e estudosos dos anos nos que a illa foi símbolo da represión.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925