Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Varios obradoiros preparan comparsas para os desfiles de Entroido

[19-02-2006] As sesións de contacontos de piratas que se desenvolveron nas bibliotecas e nos locais sociais das parroquias, o obradoiro de cultura exipcia de Trasmonte e os obradoiros das casas de cultura nutrirán de comparsas e de disfraces os desfiles que o martes de Entroido se celebrarán en Bertamiráns e no Milladoiro. Máscaras e personaxes serán recollidos polas instantáneas das 60 cámaras fotográficas que participarán nos safaris fotográficos previstos para as dúas localidades.

Os domingos infantís traen os Monicreques de Kukas ao Milladoiro

[18-02-2006] O cantar da cantaruxa é o título da peza que o domingo19 de febreiro, ás 12 do mediodía, porá en escena na Casa da Cultura do Milladoiro a Compañía compostelá Os Monicreques de Kukas. A actividade enmárcase dentro do programa Domingos Infantís que organiza a Concellaría de Cultura e Deportes.

O Foro da Axenda 21 Local conta xa con 50 participantes

[17-02-2006] Onte comezou a espallarse oficialmente a Axenda 21 Local por todo o concello de Ames. Logo dun ano traballando na análise da situación do noso territorio, por fin se presentou o diagnóstico de como estamos no tocante a usos do chan, calidade de vida, demografía, urbanismo e todos aqueles aspectos que inciden na sostenibilidade dos recursos e do ambiente. DS Consultores achegou os datos do seu estudo sobre Ames. Sen embargo tamén quedou constituído o Foro de Participación Social, do que xa forman parte 50 persoas entre políticos, representantes de entidades e tamén veciños que apostan pola sostenibilidade de Ames.

Deportistas de elite participarán na Xornada de Deportes de Raqueta do Milladoiro

[17-02-2006] A área deportiva do Milladoiro acollerá o próximo sábado, día 18 de febreiro, a partir das 16 horas, unha xornada de deportes de raqueta na que os adestradores profesionais Pablo Illodo e Miguel Casal impartirán clases de tenis, bádminton e tenis de mesa. A actividade, organizada pola Concellaría de Deportes, inclúe tamén unha exhibición de tenis a cargo de Illodo e de Casal que terá lugar a partir das 19,30.

Os alcaldes de Ames, Rois e Dodro asinan o convenio para promover a agricultura sustentable

[17-02-2006] Os alcaldes de Rois, Dodro e Ames asinaron esta mañá o convenio para a posta en marcha do programa conxunto de agricultura sustentable que promoverá tanto a produción como o consumo de alimentos sans. O programa levará o nome de Proxecto Amorodo, acrónimo que recolle as iniciais dos tres concellos implicados, e se desenvolverá por espazo de dous anos e catro meses. Amorodo nace a instancias da Concellaría de Desenvolvemento Local de Ames e conta con apoio económico da Deputación da Coruña.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925