Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Arranca a transformación do Milladoiro

[22-06-2006] O Concello vén de resolver os concursos de elaboración de tres proxectos relacionados coa transformación urbanística do Milladoiro. Trátase dos referidos á urbanización da Travesía do Porto e as reurbanizacións das rúas Anxeriz, Travesa e rúa de Abaixo. Tres empresas de arquitectura e enxeñaría poñeranse agora mans á obra para definiren no papel como quedarán estas tres zonas do xa coñecido como Ensanche do Milladoiro. Desta maneira bota a andar o proceso de configuración das futuras áreas residenciais e de servizos deste núcleo pensando máis na xente que nos ladrillos.

Novo verán, novos deportes

[22-06-2006] Béisbol, voleibol e bádmiton son as novidades deportivas que para este verán propón a Concellaría de Cultura e Deportes aos cidadáns de Ames. Ademais, o departamento programa rutas de sendeirismo polas ribeiras do Tambre e mantén, como en anos anteriores, os cursos de natación e de iniciación ao piragüismo.

Músicos folk de sona internacional impartirán clases no Curso de baile e música tradicional

[21-06-2006] O violinista e gaiteiro californiano Kevin Carr, o guitarrista e violinista especializado nos estilos tradicionais de québec, irlandés, cape breton e bluegrass Ray Bierl, e o multipremiado gaiteiro galego Xesús Bahamonde, entre outros, converterán o Pazo da Peregrina de Bertamiráns nun verdadeiro campus especializado en música e baile tradicional. O Curso que organizan para os días 13 e 14 de xullo a Concellaría de Cultura e a Asociación Follas Novas oferta clases e obradoiros dunha ampla variedade de disciplinas tradicionais. A inscrición para o curso xa está aberta.

A Aula da Natureza realiza excursións pedagóxicas co IES de Bertamiráns

[21-06-2006] A Estación de Bioloxía Mariña da Graña, o Instituto Galego de Formación en Acuicultura e a Ruta da auga de Riamonte son os obxectivos das excursións pedagóxicas que estes días levan a cabo os rapaces e rapazas do IES de Bertamiráns. O seguimento dos procesos naturais á través dun método de estudo científico baseado na observación constitúen o soporte sobre o que traballan os técnicos da Concellaría de Medio Ambiente que guían as saídas.

A Escola de Verán admite a todos os nenos e as nenas que presentaron solicitude

[21-06-2006] Aínda que nun principio a Escola de Verán ofertaba 90 prazas, a cantidade de solicitudes recibidas para poder acollerse a este servizo propiciou que a Concellaría de Educación ampliara o número e admitira a todos os nenos e todas as nenas que o pediron. O resultado é que case se duplicaron as prazas previstas e 175 cativos e cativas poderán participar neste programa de conciliación da vida laboral e familiar.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925