Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Un total de 548 usuarios fixeron uso do Punto Limpo de Ames durante o mes de outubro

[10-12-2018] O centro de depósito de residuos do Punto Limpo de Ames, situado no polígono do Milladoiro, rexistrou durante o pasado mes de outubro 548 visitas. Das achegas feitas ao longo do mes destacan fundamentalmente os residuos eléctricos e electrónicos que se achegaron aos 3.391 quilogramos. Este servizo municipal está xestionado pola empresa Urbaser.

O goberno municipal volve a reforzar o Servizo de Axuda no Fogar cun novo incremento de 5.030 horas

[08-12-2018] A Xunta de Goberno Local vén de aprobar a segunda modificación do contrato do Servizo de Axuda no Fogar, na modalidade de SAF Dependencia do Concello de Ames. A Consellería de Política Social vén de aprobar un novo reforzo de horas, e vista a necesidade de poder dar cobertura á demanda existente, o Concello volve a reforzar o servizo cun incremento de 5.030 horas, quedando así o total de horas anuais de prestación do servizo en 51.006 horas para o SAF-Dependencia. Actualmente, hai 77 persoas que son beneficiarias do Servizo de Axuda no Fogar, polo sistema de dependencia. Dende o Concello de Ames indican que con este novo incremento de horas, agárdase poder dar cobertura a unha parte das persoas que demandan este servizo e que están na listaxe de espera.

O Concello de Ames invita ás familias do municipio a acoller nenos saharauís a través do programa Vacacións en Paz

[08-12-2018] A través da iniciativa Vacacións en Paz as familias de Ames, ou de calquera concello galego, poden acoller durante os meses de xullo e agosto a nenos e nenas saharauís que viven unha difícil situación nos campamentos de refuxiados de Tindouf, en Alxeria. O Concello de Ames anima a toda a veciñanza interesada en participar do programa a asistir a unha nova reunión que organiza a Asociación Solidariedade Galega co Pobo Saharauí. A xuntanza terá lugar o vindeiro mércores, 12 de decembro, ás 20:00 horas, no salón de Plenos da Casa do Concello. Quen non poida acudir á reunión, pero desexe participar no programa, pode poñerse en contacto co departamento de Servizos Sociais do Concello, no número de teléfono 981 377 656.

A Aula CeMIT prepara varios cursos e actividades durante os meses de decembro e xaneiro

[07-12-2018] O inverno chega cargado de actividades á Aula CeMIT de Ames, que ten programadas un total de dezaseis actividades para os meses de decembro e xaneiro, entre as que se contan varios cursos para adultos, videoconferencias, talleres e actividades para os nenos e nenas. Para obter máis información ou para reservar praza nalgunha destas actividades, as persoas interesadas pódeno facer a través da web https://cemit.xunta.gal/gl/centro/9, achegándose á Aula CeMIT situada na Casa da Cultura de Bertamiráns, chamando ao número de teléfono 662 371 511 ou enviando un correo electrónico ao enderezo cemit.ames@xunta.gal.

A Escola Infantil A Madalena celebrou un ano máis o mes da música

[07-12-2018] Con motivo da celebración de Santa Icía, patroa da música, a Escola Infantil A Madalena converte novembro no mes máis musical do ano. Nesta ocasión, ao longo do mes pasaron pola escola varios músicos profesionais e familiares de alumnos ou alumnas, que teñen a música como afección e/ou tocan algún instrumento. O mes da música rematou coa xa tradicional Festa do rock do centro.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925