Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

A Aula da Natureza de Ames organiza este venres unha acampada para descubrir a fauna nocturna da contorna

[17-10-2018] De cara ao curso 2018-19, a Aula da Natureza do Concello de Ames pon en marcha os programas Variedade é Vida - Vida é Variedade (VéV) e Noites na natureza para achegar a natureza aos veciños e veciñas. Esta programación dará comezo o vindeiro venres, 19 de outubro, cunha acampada e ruta polo monte de San Marcos para observar o comportamento da fauna nocturna, dirixida a nenos/as de entre 8 e 12 anos. Para participar en calquera das actividades organizadas pola Aula da Natureza é necesario inscribirse enviando o formulario –que se pode atopar baixo o apartado de descargas desta nova– ao enderezo de correo electrónico auladanatureza@concellodeames.gal.

O Milladoiro acollerá a batalla musical do grupo Píscore no seu Concerto singular

[17-10-2018] O próximo venres, 19 de outubro, o grupo Píscore poñerá ao público na tesitura de decidir cal dos seus catro compoñentes é capaz de tocar a marimba de xeito máis orixinal e abraiante. Este Concerto singular, no que se mesturan comedia xestual e música en directo, terá lugar na Casa da Cultura do Milladoiro ás 18.00 horas. As entradas para o espectáculo xa están dispoñibles na Billeteira electrónica, cun prezo de catro euros, con descontos do 50% para persoas maiores de 65 anos, menores de 12 e estudantes con carné.

Abre o prazo de presentación de solicitudes para a convocatoria de axudas para a adquisición de libros de texto e material escolar destinadas ao alumnado do segundo ciclo de educación infantil

[17-10-2018] O Concello de Ames, a través da Concellaría de Educación e Cultura, informa da publicación no Boletín Oficial da Provincia (BOP) da convocatoria de axudas, para a adquisición de libros de texto e material escolar destinadas ao alumnado do segundo ciclo de educación infantil (curso 2018-2019). O prazo de presentación de solicitudes permanecerá aberto do 18 de outubro ao 16 de novembro. A contía máxima destinada a esta convocatoria ascende a 8.500 euros, sendo de 120 euros o importe máximo concedido por cada nena ou neno. Premendo no enlace que está á dereita, baixo o apartado de descargas, poderás consultar as bases desta convocatoria de axudas e imprimir o impreso de solicitude.

O Centro Deportivo Municipal da Telleira abre as súas portas á veciñanza amesá para que proben as novas instalacións

[16-10-2018] O Centro Deportivo Municipal BeOne A Telleira celebrará unha semana de portas abertas do 17 ao 24 de outubro, para que todos os veciños e veciñas de Ames poidan probar o novo equipamento e as novas instalacións tras tres meses de obras de ampliación e reformas dos espazos actuais. Ao longo de sete días o devandito centro deportivo acollerá unha programación especial de actividades. As obras executadas permitiron dispor dunha nova sala de fitness, novas salas de actividades, nova área de xogos infantil e novo sistema de reserva de actividades.

A Aula CeMIT ofrece novas actividades para os meses de outubro e novembro

[16-10-2018] Durante os meses de outubro e novembro, a Aula CeMIT ten programada unha extensa lista de actividades dirixidas a todas as idades. Durante o mes de outubro, realizaranse cursos de mecanografía e informática dirixidos ás nenas e nenos, continuarase co ciclo de ofimática, e realizaranse varios seminarios online sobre o smartphone, que se estenderán ata novembro. Para obter máis información ou para reservar praza nalgunha destas actividades, as persoas interesadas pódeno facer a través da web https://cemit.xunta.gal/gl/centro/9, achegándose á Aula CeMIT situada na Casa da Cultura de Bertamiráns, chamando ao número de teléfono 662 371 511 ou enviando un correo electrónico ao enderezo cemit.ames@xunta.gal.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925