Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Constitúese a Asociación de Entidades Locais pola Lingua Galega

[15-02-2019] O Pazo de Raxoi, en Santiago de Compostela, acolleu esta mañá o acto de constitución da Asociación de Entidades Locais pola Lingua Galega. Impulsada por un total de quince concellos, entre os que se atopa Ames, a entidade ten como obxectivo desenvolver proxectos conxuntos no ámbito da normalización do idioma galego. Ao acto acudiron a concelleira de Normalización Lingüística de Ames, Isabel Vaquero, a técnica municipal, Rosa Moreiras, e responsables da política lingüística de todos os concellos integrantes do proxecto.

Comeza o prazo de inscrición para participar no programa de conciliación Primavera Lúdica

[15-02-2019] O Concello de Ames, a través da Concellaría de Educación e Cultura, abre hoxe o prazo de inscrición para participar no programa de conciliación laboral e familiar Primavera Lúdica. O servizo desenvolverase os días 15, 16, 17 e 22 de abril, coincidindo coas vacacións escolares de Semana Santa, durante os que se organizarán varias actividades educativas e culturais destinadas aos cativos e cativas da casa. A través desta iniciativa buscase facilitarlle aos pais e nais a conciliación da súa vida laboral e familiar durante as vacacións escolares. O prazo para presentar as solicitudes de inscrición remata o vindeiro 1 de marzo. Premendo nos enlaces que están a túa dereita, baixo o apartado de descargas, poderás obter as bases dos programas lúdicos, o impreso de inscrición e os prezos do servizo.

Únete ao programa “Conectad@s”, un rexistro voluntario de persoas que viven soas

[14-02-2019] O Concello de Ames, a través da Concellaría de Servizos Sociais, presentou este mércores, 13 de febreiro, no local social do Club de xubilados e pensionistas do Milladoiro, o programa “Conectad@s”. Trátase dunha nova iniciativa posta en marcha polo Concello, a través do cal se vai a elaborar un rexistro voluntario para persoas que viven soas. Sobre esta iniciativa e outros programas dirixidos ás persoas maiores e persoas que viven soas, tratou a charla “Recursos para persoas que viven soas”, que impartiu o traballador social, Jesús A. Tato, e na que tamén colaborou a psicóloga municipal, Mónica Antelo. Premendo no enlace que está a túa dereita, baixo o apartado de descargas, poderás obter o impreso de inscrición no programa Conectad@s.

Bertamiráns acolle este venres o concerto de presentación do novo disco de Susana Seivane

[14-02-2019] Susana Seivane dáse cita este venres, 15 de febreiro, na Casa da Cultura de Bertamiráns para presentar ‘FA’, o seu novo disco. A partir das 21.00 horas, os asistentes poderán facer un percorrido por doce novas pezas nas que a artista plasma as súas reflexións sobre a maternidade, a familia e os pequenos momentos da vida diaria. As entradas están dispoñibles na páxina Eventbrite cun custo de 11,09 euros.

A programación de primavera de Ames inclúe máis de 50 actividades

[14-02-2019] O Concello de Ames adiantase á primavera cunha programación formada por un total de 54 actividades, dirixidas a todos os rangos de idade. A oferta inclúe un amplo abano de iniciativas organizadas polos departamentos de mocidade, cultura, deportes, medio ambiente, normalización lingüística e polas bibliotecas municipais. Así, inclúe obradoiros, galas, contacontos, excursións, eventos deportivos e numerosas obras teatrais. O programa, que comezou o venres 1 de febreiro, continúa este venres coa peza teatral O Mago de Oz e o concerto de presentación do novo disco de Susana Seivane.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925