Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

O Concello de Ames adecúase ao Regulamento Xeral de Protección de Datos

[13-08-2018] Co fin de dar cumprimento á normativa europea sobre protección de datos, que resulta aplicable dende o pasado 25 de maio, o Concello de Ames asinou un contrato que permite a execución das tarefas de adecuación ao Regulamento Xeral de Protección de Datos 2016/679. Esta nova regulación, que por primeira vez se fai a través dun Regulamento Europeo, comporta cambios significativos na protección de datos de carácter persoal, tanto dende o punto de vista dos dereitos das personas, como das obrigas das persoas e entidades que tratan datos de carácter persoal.

Alberto Viaño, do Club de Piragüismo Ribeiras do Tambre, imponse na XXXIII edición do Descenso do Tambre

[13-08-2018] A praia fluvial de Tapia acolleu este sábado, 11 de agosto, a XXXIII edición do descenso do Tambre, na que uns 450 deportistas xuntáronse en Ames para participar desta proba deportiva e da de circuíto. Alberto Viaño, do Club de Piragüismo Ribeiras do Tambre, logrou o primeiro posto na categoría sénior K-1. O padexeiro local foi o único que baixou dos 25 minutos para cubrir os 5.400 metros entre Portomouro e a praia fluvial de Tapia. Premendo no enlace que está a túa dereita, baixo o apartado de descargas, poderás obter as clasificacións da proba do descenso do Tambre e das probas de circuíto na praia fluvial de Tapia.

A Asociación Solidariedade Galega co Pobo Saharauí recada fondos no mercadillo de Bertamiráns

[13-08-2018] A Asociación Solidariedade Galega co Pobo Saharauí (SOGAPS) estivo representada o pasado sábado, 11 de agosto, a través dun posto solidario no mercadillo de Bertamiráns. Alí déronse cita algunhas das familias e dos nenos e nenas que están a pasar o verán en Ames a través do programa Vacacións en Paz. A asociación acadou os obxectivos de recadar fondos para o Hospital Galicia instalado nos campamentos saharauís e de dar a coñecer a novas familias amesás o programa Vacacións en Paz con vistas ao próximo ano. Con estes mesmos propósitos, estase a preparar unha ‘Tarde de té’ o mércores 22 de agosto no Milladoiro.

Unha unidade móbil do Centro de Transfusión de Galicia atenderá as doazóns de sangue este luns e martes no Milladoiro

[11-08-2018] A Concellaría de Sanidade, Servizos Sociais e Igualdade informa á veciñanza amesá de que unha unidade móbil do Centro de Transfusión de Galicia (CTG) estará este luns e martes, 13 e 14 de agosto, no Milladoiro. O vehículo atoparase estacionado na rúa da Curuxa, no cruce coa rúa Rosalía de Castro, en horario e 9:30 a 14:30 horas e de 15:30 a 21:00 horas. Lémbrase que se deberá acudir en posesión da tarxeta de doante ou do DNI ou un documento identificativo similar. O Concello de Ames colabora coa campaña solidaria da Axencia Galega de Doazón de Sangue e Órganos #súmatedoasangue.

Uns 450 padexeiros e padexeiras participarán este sábado no XXXIII Descenso do Tambre de piragüismo de Ames

[10-08-2018] A praia fluvial de Tapia acolle este sábado, 11 de agosto, a XXXIII edición do descenso do Tambre. Arredor de 450 padexeiros e padexeiras de clubs de toda Galicia xuntaranse na tradicional baixada do Tambre. O Club de Piragüismo Ribeiras do Tambre, xunto co Concello de Ames e maila Federación Galega de Piragüismo, organizan esta competición que chega a súa trixésimo terceira edición. A proba de descenso, que ten un percorrido de 5.400 metros de distancia, realizarase ás 12:30 horas, mentres que a proba de circuíto na que participan rapaces e rapazas das categorías benxamín, alevín e infantil desenvolverase a partir das 16:00 horas na praia fluvial de Tapia. As embarcacións que participarán nesta proba son K-1 e C-1.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925