Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

12 padexeiros e padexeiras do Club Ribeiras do Tambre acadan medalla na XXXII edición do Descenso do Tambre

[14-08-2017] A praia fluvial de Tapia acolleu este domingo, 13 de agosto, a XXXII edición do descenso do Tambre. Uns 240 deportistas, pertencentes a 15 clubs galegos, xuntáronse en Ames para participar nesta proba deportiva. Jaime Sobrado, do Club Náutico Ría de Pontevedra, logrou o primeiro posto na categoría sénior K-1 masculina, mentres que na categoría sénior K-1 feminina o primeiro posto foi para María Alonso, do Club de piragüismo Olívico. Na categoría C-1 sénior masculina gañou Francisco Rodríguez, do Club piragüismo Rianxo-Toffe. Esta proba está organizada polo Club de Piragüismo Ribeiras do Tambre en colaboración co Concello de Ames e maila Federación Galega de Piragüismo. Premendo no enlace que está a túa dereita, baixo o apartado de descargas, poderás obter as clasificacións da proba do descenso do Tambre e das probas de circuíto na praia fluvial de Tapia.

O Concello de Ames rehabilitará a antiga escola unitaria de Firmistáns para dedicala a vivenda de tránsito e uso veciñal

[12-08-2017] A Xunta de Goberno Local vén de aprobar este venres, 11 de agosto, en sesión extraordinaria o inicio do expediente de contratación das obras para rehabilitar a antiga escola unitaria de Firmistáns, situada na parroquia de Bugallido. O goberno municipal conta cunha axuda de 70.670 euros, ao abeiro da medida Leader do PDR de Galicia 2014-2020 (convocatoria 2017-2018), cofinaciado polo Fondo Europeo Agrícola de Desenvolvemento Rural (FEADER), para acondicionar este edificio que pasará a ter un uso social e veciñal coa finalidade de ser un fogar de tránsito, para acoller a persoas en situación de risco social temporal. Este proxecto ten un custo de 100.000 euros, polo que o Concello terá que achegar 29.330 euros para completar o importe necesario.

Arredor de 250 padexeiros e padexeiras participarán este domingo no XXXII Descenso do Tambre de piragüismo de Ames

[12-08-2017] A praia fluvial de Tapia acolle este domingo, 13 de agosto, a XXXII edición do descenso do Tambre. Arredor de 250 padexeiros e padexeiras de clubs de toda Galicia xuntaranse na tradicional baixada do Tambre. O Club de Piragüismo Ribeiras do Tambre, xunto co Concello de Ames e maila Federación Galega de Piragüismo, organizan esta competición que chega a súa trixésimo segunda edición. A proba de descenso, que ten un percorrido de 5.400 metros de distancia, realizarase ás 16:00 horas, mentres que a proba de circuíto na que participan rapaces e rapazas das categorías benxamín, alevín e infantil desenvolverase a partir das 17:00 horas na praia fluvial de Tapia. As embarcacións que poden participar nesta proba son K-1 e C-1.

O Milladoiro acolle unha xornada de achegamento á cultura do pobo saharauí

[11-08-2017] Este xoves, entre as 17:00h e as 20 horas, a veciñanza do Milladoiro puido achegarse á cultura do pobo saharauí a través dunha xornada organizada pola Asociación Solidariedade Galega co Pobo Saharauí (SOGAPS), en colaboración co Concello de Ames. Ao longo da tarde houbo música saharauí e xogos populares; asemade, tamén se realizou a cerimonia do té nunha jaima instalada ao carón da piscina municipal. Nesta xornada participaron as nenas e nenos saharauís acollidos nos concellos de Ames, Brión, Teo e Santiago de Compostela.

O Concello de Ames colabora coa campaña solidaria da Axencia Galega de Doazón de Sangue e Órganos #súmatedoasangue

[11-08-2017] O Concello de Ames e a Axencia Galega de Doazón de Sangue e Órganos (ADOS) impulsan de novo a participación nas campañas de doazón de sangue para garantir o labor dos hospitais galegos, que precisan preto de 10.000 doazóns de sangue cada mes para atender a todos os doentes. A unidade móbil de doazón estará os días 17 e 18 de agosto no Milladoiro e os días 24 e 25 en Bertamiráns.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925