Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

Ames preparou unha ampla, variada e participativa programación para conmemorar o día de Rosalía

[12-02-2019] O Concello de Ames volverá render homenaxe a Rosalía de Castro polo aniversario do seu nacemento, desenvolvendo unha serie de iniciativas agrupadas na programación “Ames con Rosalía”. O propio 24 de febreiro, efeméride do nacemento da autora, realizarase unha gala poético-musical que contará con lecturas, dramatizacións, videocreacións e coa actuación de Rosa Cedrón. Para alén diso, a programación tamén engloba diferentes iniciativas como “Rosalía tamén vive aquí”, no ámbito educativo; “Rosalía tamén é nosa”, unha iniciativa que pretende encher as redes sociais de vídeos curtos con textos de ou para Rosalía, en boca da veciñanza de Ames ou de calquera outro lugar. “Viaxando con Rosalía”, unha excursión poética á casa de Rosalía coa escritora María López Sández, encargada de achegarnos a figura e a obra rosaliana nesta viaxe. Organizadas pola Concellaría de Normalización Lingüística, as diferentes actividades programadas teñen como obxectivo principal difundir a obra e o pensamento rosaliano entre a veciñanza do concello.

O amesán, Samuel Míguez, gaña o campionato galego de natación nas probas de 100m e 200m braza e queda subcampión en 100m estilos

[11-02-2019] A piscina do complexo deportivo Rías do Sur, de Pontevedra, acolleu os días 2 e 3 de febreiro o Campionato galego de natación alevín de inverno. En dito campionato, o amesán, Samuel Míguez Feijóo, gañou o campionato galego alevín (14 anos) nas probas de 100 metros e 200 metros braza e quedou subcampión en 100 metros estilos. Deste xeito, consegue a mínima na modalidade de 100 metros braza para disputar o campionato de España individual de natación. Ademais, Samuel Míguez foi convocado pola Federación Galega de Natación para o campionato de España de natación alevín por CC.AA., que se celebrará en Madrid os días 2 e 3 de marzo no Centro de Natación M´86.

O Camiño a Santiago da Ría de Muros-Noia promove o seu itinerario no Fairway 2019

[11-02-2019] A Feira dos Camiños de Santiago “Fairway 2019” acolleu esta mañá a reunión da Mesa de Traballo do Camiño da Ría de Muros-Noia correspondente ao mes de febreiro. Un encontro no que participaron representantes dos nove Concellos implicados na oficialización deste itinerario xacobeo: Ames, Brión, Lousame, Muros, Noia, Outes, Porto do Son, Rois e Santiago de Compostela. Nesta xuntanza deuse conta dos avances realizados para conseguir o recoñecemento do itinerario cultural a Santiago da Ría de Muros-Noia.

O Mago de Oz chega ao escenario da Casa da Cultura do Milladoiro

[11-02-2019] O vindeiro venres, 15 de febreiro, o escenario da Casa da Cultura do Milladoiro converterase por unhas horas no máxico mundo de Oz, un lugar no que Dorothy, Espantallo, Homelata e León vivirán unha chea de aventuras e perigos para alcanzar os seus desexos. Dirixido a toda a familia, as entradas xa están dispoñibles na Billeteira electrónica. O 10% das entradas resérvanse, como é habitual, para vender de xeito presencial desde unha hora antes do comezo do espectáculo.

Comezan as obras para adaptar a rotonda das Galanas ao xiro dos vehículos pesados e poidan acceder con solvencia a autoestrada AG-56

[11-02-2019] Esta mañá comezaron as obras para adaptar a rotonda das Galanas, para permitir o xiro dos vehículos pesados e poidan acceder con solvencia a autoestrada AG-56. Este proxecto, que depende do Ministerio de Fomento, enmárcase dentro dun serie de medidas para eliminar a circulación de vehículos pesados, con MMA maior a 30 toneladas, pola avenida de Rosalía de Castro, no Milladoiro. Ademais, a semana pasada colocáronse AG-56 e no corredor AC-522 as sinais que proporcionan información sobre a ruta alternativa de circulación para non atravesar O Milladoiro. Dende o pasado 12 de decembro os vehículos pesados non poden circular pola avenida de Rosalía de Castro.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925