Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

A Xunta Local de Seguridade confirma os bos datos de Ames sendo a taxa de criminalidade 4 puntos inferior á da provincia

[09-04-2019] A subdelegada do Goberno na Coruña, Pilar López-Rioboo, e mailo alcalde de Ames, José Miñones, presidiron esta mañá a Xunta Local de Seguridade, unha reunión na que se analizou a seguridade cidadá no municipio. No balance as cifras confirman un bo comportamento da seguridade no concello, sendo a taxa de criminalidade 4 puntos inferior á da provincia, case 2 puntos menor que a media Galega e 18 puntos menos que a de España, o que sitúa a Ames entre os concellos máis seguros de España. Ademais, esta mañá aprobouse a incorporación do Concello de Ames ao Sistema de seguimento integral nos casos de violencia de xénero. En dita xuntanza tamén estiveron representantes da Guarda Civil e do Corpo Nacional de Policía adscrita á Xunta de Galicia, así como varios representantes municipais.

Abril chega ás bibliotecas de Ames cunha chea de contacontos, obradoiros e actividades para conmemorar o Día do Libro

[08-04-2019] A Concellaría de Educación e Cultura de Ames prepara unha ampla programación para o mes de abril con motivo do Día Mundial do Libro, que se conmemora o vindeiro día 23. Así, realizaranse varias sesións de contacontos nas bibliotecas municipais e nos locais sociais de Augapesada e Bugallido, un obradoiro creativo no Milladoiro e Bertamiráns, actividades relacionadas coa lectura e a iniciativa Literatura na praza. Para participar no obradoiro, dirixido ao alumnado de 3º a 6º de Primaria, será preciso inscribirse antes 15 de abril a través dos teléfonos 981 88 48 29 (Bertamiráns) e 981 53 08 07 (Milladoiro), ou mediante o enderezo de correo electrónico biblioteca@concellodeames.gal. As inscricións tamén se poden tramitar nas propias bibliotecas.

O I Trofeo de Tenis Concello de Ames disputarase do 15 ao 21 de abril no Real Aeroclub de Santiago

[08-04-2019] O Concello de Ames e o Real Aeroclub de Santiago organizan a primeira edición do Trofeo de Tenis Concello de Ames, que terá lugar do luns 15 ao domingo 21 de abril. O torneo estará dividido nas modalidades federada e open non competitivo. Na federada poderán participar persoas que posúan a licenza competitiva do 2019, nas categorías benxamín, alevín, infantil, cadete, absoluto, veteranos + 35 e veteranos +50; mentres que o open irá dirixido a nenos/as de 6 a 10 anos e estará dividido nas categorías mini-tenis, 3/4 pista e pista completa. O prazo para inscribirse remata o vindeiro xoves 11 de abril. O custo de inscrición para participar nunha categoría é de 12 euros para adultos e 6 euros para menores, mentres que para inscribirse en ambas categorías é de 20 euros para adultos e 10 para nenos/as.

O Club Voleibol Bruxas gaña o campionato galego sénior feminino e clasifícase para a fase de ascenso a primeira división feminina

[08-04-2019] O equipo feminino do Vitaldent Santiago C.V. Bruxas gañou esta fin de semana o campionato galego sénior feminino, que se disputou este sábado, 6 de abril, no pavillón polideportivo de Bertamiráns. En semifinais gañáronlle ao Zalaeta da Coruña por 3-2, nun último set de infarto no que o equipo amesán impúxose por 16 puntos a 14. Na final, impuxéronse ao Calasancias Coruña por 3 sets a 1. Ademais, a xogadora do C.V. Bruxas, Sara Antelo, foi nomeada MVP do torneo logo de alcanzar a cifra de 24 puntos na semifinal e 31 puntos na final. O equipo amesán e mailo Calasancias Coruña clasificáronse para a fase de ascenso a primeira división feminina que se xogará do 9 ao 12 de maio na cidade de Haro, na Rioxa.

Remata a terceira fase do Plan municipal de prevención de incendios forestais no que se plantaron 602 árbores en 4,3 hectáreas

[06-04-2019] Esta semana realizouse unha xuntanza no salón de plenos da Casa do Concello, na que participaron o persoal técnico da Concellaría de Medio Ambiente, membros do goberno municipal, e o persoal da Brigada de plantación forestal e da Brigada Aprol Rural. En dita reunión deuse conta do traballo feito durante os últimos meses tanto na terceira fase do Plan municipal de prevención e incendios forestais, como na revisión e na actualización das redes secundarias de faixas de xestión de biomasa do Concello de Ames.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925