Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

O Concello de Ames aprobou no 2018 un total de 204.112,41€ en concepto de renda social e axudas a situacións de emerxencia

[09-02-2019] A Concellaría de Sanidade, Igualdade e Servizos Sociais de Ames fai balance do primeiro ano de funcionamento da Renda social e de garantía mínima e as axudas para a recuperación en situacións de emerxencia social, ao abeiro da que se aprobaron axudas por un total de 204.112,41 euros. Trala entrada en vigor desta ordenanza reguladora o pasado 14 de decembro de 2017, concedéronse 14 rendas básicas, das que 3 foron prorrogadas, por valor de 52.728,14€. Asemade, destináronse 46.419,09 euros concedidos para alugueiros; 82.484,19€ para necesidades básicas; 10.329,13€ para pobreza enerxética; 8.111,31€ para habitabilidade; 1.535,88€ para gastos médicos; 1.849,67€ para auga e 655€ para formación. O 31 de decembro o importe pagado ás familias beneficiarias ascendía a case o 70% do importe total concedido.

Susana Seivane escolle Ames para presentar o seu novo disco ‘FA’

[09-02-2019] Bertamiráns acolle o vindeiro venres, 15 de febreiro, o concerto de presentación de ‘FA’, o novo traballo da gaiteira Susana Seivane. Durante o evento, que terá lugar na Casa da Cultura a partir das 21.00h, a artista fará un percorrido polos temas do seu novo álbum, doce pezas adicadas aos seus fillos a través das que descobre ante o público os sentimentos que despertan nela a maternidade e a vida familiar. As entradas xa poden adquirirse na páxina Eventbrite.

O Concello de Ames asina o convenio de colaboración coa Asociación Solidariedade Galega co Pobo Saharauí para participar no programa Vacacións en Paz 2019

[08-02-2019] Esta mañá o alcalde de Ames, José Miñones, e a presidenta da asociación Solidariedade Galega co Pobo Saharauí (SOGAPS), María Teresa Isla, asinaron o convenio de colaboración a través do cal o Concello participa no programa Vacacións en Paz 2019, que promove a entidade. Neste acto tamén estiveron presentes a concelleira de Sanidade, Servizos Sociais e Igualdade, Luísa Feijóo, a representante a asociación na comarca, Esther Ibarra, a secretaria de SOGAPS, e o técnico municipal, Leonardo Pena . A través deste acordo, o Concello de Ames sufragará o billete de avión de ida e volta das seis nenas e nenos, que pasarán os meses de xullo e agosto con familias de acollida amesás.

O período medio de pago situase en 5,63 días

[08-02-2019] A Concellaría de Economía e Facenda dá conta da información periódica trimestral do cuarto trimestre do ano 2018, no que continúa esa rebaixa no período medio de pago ata acadar os 5,63 días. Durante o exercicio 2018 o período medio de pago foi de 11,48 (primeiro trimestre); 8,32 (segundo trimestre); 8,62 (terceiro trimestre); ara chegar á cifra de 5,63 do cuarto trimestre. Esta redución adquire maior importancia se se ten en conta que se incrementou a prestación dos seus servizos e o Concello de Ames ten que atender na actualidade un gran volume de xestión, pois tramita preto de 7.000 facturas ao ano.

Comeza o Club de Debate en Ames cunha xornada de formación na que participan 80 mozos e mozas

[08-02-2019] A Casa da Cultura do Milladoiro acolleu esta mañá a primeira das xornadas de formación preparatoria do Club de Debate 2019. A esta primeira xornada asistiron 80 rapazas e rapaces, integrantes dos 9 equipos dos Concellos de Ames, Santiago de Compostela e Teo. Tres do IES de Bertamiráns e dous do IES do Milladoiro. O Club de Debate é unha actividade de dinamización lingüística dirixida a mozas e mozos de 3º e 4º da ESO, 1º de Bacharelato e de ciclos formativos. Nos IES do Concello de Ames a formación continuará durante as próximas semanas nos propios centros de ensino, dirixida por Iván Olmos Ferreiro, experto en oratoria e habilidades comunicativas ademais de subcampión nacional e semifinalista mundial de debate. A iniciativa inclúe premios para os equipos gañadores das fases de zona e un premio final dunha viaxe en grupo.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925