[27-06-2017] Este mércores, 28 de xuño, a bandeira do arco da vella será colgada no balcón da Casa do Concello con motivo da conmemoración do Día das diversidades sexuais. O acto, que se celebrará ás 12:00 horas, inclúe a lectura dun manifesto acordado entre os diferentes grupos políticos da corporación municipal e o reparto de material como chapas, mochilas ou adhesivos. A iniciativa encádrase dentro da campaña “Construíndo diversidade”, organizada pola Deputación da Coruña e na que participan 31 concellos.
Desde este mércores, 28 de xuño, “Día das diversidades sexuais”, a bandeira do arco da vella ondeará no balcón do Concello de Ames. Ao acto está convidada toda a veciñanza do concello, así como as traballadoras e traballadores municipais e o resto de grupos políticos. A iniciativa tamén incluirá a lectura dun manifesto acordado entre os diferentes grupos políticos da corporación municipal, así como o reparto, entre as e os/as asistentes, de diferente material como chapas, mochilas e adhesivos.
Durante a lectura do manifesto tamén se estenderá nas escaleiras a bandeira do arco da vella. Cada vez que se lea un parágrafo, unha persoa estendera unha tea dunha das cores da bandeira para, finalmente, conformala na súa totalidade. O manifesto será lido por varios membros da corporación municipal e pola técnica do Centro de Información á Muller (CIM), María Teresa Arufe.
A concelleira de Sanidade, Servizos Sociais e Igualdade, Luísa Feijóo, incidiu en que “non podemos permitir que nunha sociedade avanzada e nos tempos en que estamos se sigan a producir casos de desigualdade, discriminación, acoso, bullyng e burla por mor da identidade sexual ou de xénero. Agora máis que nunca é necesario sacar a rúa a nosa repulsa e informar, sensibilizar, visibilizar a problemática a que se enfronta o colectivo LBGTQI para que non siga a ocorrer. E nesta loita debemos estar todos e todas. Todos e todas somos diferentes e somos iguais. Na diversidade está a riqueza”.
Construíndo diversidade
Esta iniciativa encádrase dentro da campaña organizada pola sección de Servizos Sociais da Deputación da Coruña, “Construíndo diversidade”, a prol da igualdade LGBTQI. Alén de actos en varios concellos, a campaña tamén inclúe un vídeo e un xogo descargable. O obxectivo principal desta iniciativa é sensibilizar á sociedade sobre as problemáticas que afectan ao colectivo LGBTQI, apoiando a diversidade sexual e de identidade de xénero. Na campaña participan un total de 31 concellos. Premendo nos enlaces que están a túa dereita, baixo o apartado de descargas, poderás obter o devandito xogo e mailas súas instrucións.
Contido relacionado
La Voz de Galicia: "Siete municipios del área, en la campaña por la diversidad"