O Pleno aprobou, cos votos a favor dos membros do goberno municipal e do concelleiro Quique Costas de Ames Novo, o suplemento de crédito 2/2019, financiado con remanente de tesourería, para sufragar o proxecto de adquisición dun ben inmoble para o seu uso como centro Coworking. Deste xeito, non haberá que recorrer a un pago aprazado cono inicialmente estaba previsto. Coa aprobación de dito suplemento de crédito afrontarase  o pago de 182.439 euros, que se corresponden co importe das anualidades 2018 e 2019.

O pasado 4 de abril de 2019 o Concello de Ames asinou un convenio coa Deputación Provincial da Coruña para financiar o proxecto de adquisición dun ben inmoble para o seu uso como espazo de traballo colaborativo, Coworking, no marco do Plan de Emprego Local da deputación da Coruña (PEL) 2016- 2019. Dito convenio ten por obxecto a fixación das bases de outorgamento dunha subvención nominativa por parte da Deputación para o financiamento de dito proxecto. O financiamento provincial ascende a 200.000 euros sobre un orzamento máximo para a adquisición do ben que ascende a 564.879,06 euros.

O Concello de Ames, tiña previsto no orzamento municipal de 2018 e tamén no orzamento de 2019, esta operación no seu anexo de investimentos. Trala aprobación do suplemento de crédito, que se financiará co remanente de tesourería que ten o Concello, no ano 2019 vaise facer fronte a un importe de 382.439 euros (200.000 euros da subvención e 182.439 euros de fondos municipais), correspondente aos anos 2018 e 2019; no ano 2020 hai que aboar 91.219 euros; e no ano 2021 hai que afrontar a contía de 91.219 euros.  

Adhesión á Central de contratación da FEMP
A Corporación municipal aprobou por unanimidade a adhesión á Central de contratación da Federación Española de Municipios e Provincias (FEMP) á que xa están adheridos máis de 1.100 municipios de toda España. Para o Concello de Ames resulta conveniente a utilización desta Central de Contratación xa que a mesma se configura como un servizo especializado coa finalidade de introducir nas entidades locais asociadas unha simplificación administrativa na contratación e unha redución do gasto público.

Proxecto modificado de accesibilidade universal
Por outra banda, o Pleno aprobou, tamén por unanimidade, o proxecto modificado da segunda fase de mellora da accesibilidade universal en edificios públicos. Deste xeito, modificarase o proxecto como consecuencia da necesidade de dar resposta ao incremento das necesidades de atención ao público no edificio de servizos sociais municipais do Milladoiro.

Así, modifícase a distribución da planta superior eliminado os aseos adaptados (que xa existen na planta baixa) que son substituídos por un espazo diáfano onde se situará un posto de traballo e atención ao cidadán creando no tabique lindante ao hall un mostrador e ventá corredora. Este espazo diáfano complétase coa previsión de colocar un arquivo para eliminar a grande cantidade de papel e enseres amontoados. Na planta inferior crearase tamén un despacho adicional con carpintería e tabiquería acristalada.

Instauración dunha hora sen ruído nas festas
Por último, aprobouse por unanimidade unha proposta do concelleiro de Ciudadanos, José Ramón Oulego, relativa á instauración dunha hora sen ruído en todas as festas do Concello de Ames. Deste xeito, acordouse que o Concello de Ames mostre o seu apoio ás persoas que presentan Trastorno do Espectro Autista (TEA), e en xeral ás persoas con dificultades de integración sensorial, e comprométese a consensuar e acordar a instauración de “1 hora sen ruído” como mínimo, non só para as atraccións senón tamén para calquera outro tipo de actividade que se produza con motivo de todas as festas do municipio durante o horario en que estas se leven a cabo. Realizarase ao longo de todo o ano para que os nenos/as con autismo, problemas auditivos ou parálise cerebral poidan acceder ás festas de maneira normalizada.

Outro dos acordos é estudar a modificación da ordenanza municipal contra a contaminación acústica para que, no caso de ser necesario, contemple a súa instauración e que a iniciativa poida ir incorporada nos contratos coas diversas empresas que se instalen nas festas e tamén nas contratacións que realicen outras entidades e asociacións. O último acordo é que o Concello se compromete a promover campañas de sensibilización contra o autismo co obxectivo de facilitar a integración social destas persoas e fomentar o respecto á diversidade desde idades temperás, poñendo a disposición da cidadanía toda a información sobre esta iniciativa para a súa máxima difusión chegando a todo tipo de perfís.

Dende o goberno municipal manifestouse que, en colaboración coa Federación de Autismo de Galicia, se colocaron máis de 600 pictogramas en distintas instalacións municipais e que nos últimos anos se realizaron diversas actividades de concienciación con motivo da conmemoración do Día Mundial de Concienciación sobre o Autismo.