Ata este venres 17 de xaneiro está aberto o prazo de inscrición para o programa de conciliación Entroido Lúdico, que se realizará os días 3, 4 e 5 do mes de marzo. No programa poderán participar familias empadroadas en Ames con crianzas escolarizadas no 2º ciclo de educación infantil e primaria neste curso escolar e que acrediten a necesidade de conciliar a vida laboral coa familiar. O programa inclúe os servizos de comedor e Bos días e os horarios de entrada e saída son bastante amplos e flexibles, adaptándose ás necesidades familiares. As familias interesadas deberán entregar a documentación necesaria na Sede Electrónica ou de maneira presencial nas oficinas de asistencia en materia de rexistro do Concello de Ames.

Premendo na ligazón que está ao pé deste aviso pódese obter o menú das escolas infantís municipais de Ames. Este menú foi elaborado pola nutricionista municipal do Concello de Ames.

A Xunta de Galicia vén de activar unha alerta laranxa por fenómeno meteorolóxico adverso, fortes chuvias e vento, que afecta a Ames. O Concello de Ames, a través da Concellaría de Obras e Servizos Básicos, Seguridade e Alcaldía, informa que ten organizado un operativo especial para contrarrestar os efectos adversos como as inundacións provocadas polo temporal de vento e choiva que implica á Policía Local, Protección Civil, Augas de Ames e brigadas municipais. En caso de emerxencia, prégase centralizar as chamadas de emerxencia ao 112, Policía Local: 619 76 75 75; ou Protección Civil: 673 17 88 88.

O Concello de Ames informa que a incidencia na aplicación de reserva de cita da Sede electrónica para acudir ás Recepcións Reais do sábado 4 de xaneiro foi resolta, polo que xa se pode reservar con normalidade cita para ese día a través da Sede Electrónica. As Recepcións Reais do Concello de Ames faranse o venres 3 e o sábado 4 de xaneiro nos pavillóns de Bertamiráns e do Milladoiro. Os Reis Magos estarán os dous días en ambas localidades. As visitas aos Reis Magos pódense facer o venres de 17.00 a 19.30 horas e o sábado 4 pola mañá de 11.00 a 13.30 e pola tarde de 17.00 a 19.30 horas. As visitas terán un intervalo de 5 minutos por cada unidade familiar. Para participar en ditas recepcións reais é imprescindible sacar cita previa a través da Sede electrónica do Concello de Ames.