O Concello de Ames, a través da Concellaría de Benestar Social e Igualdade, organizou este venres pola tarde a quinta edición da carreira da muller “Moitos camiños, mesma meta”, que se celebrou na área deportiva do Milladoiro. Trátase dunha cita deportiva lúdica e non competitiva, incluída dentro da programación conmemorativa do Día Internacional da Muller. O obxectivo da proba é reivindicar os distintos atrancos aos que se ven sometidas todas as mulleres no día a día, a través dos obstáculos que se instalaron no circuíto. Máis de 200 participantes tiveron que completar un percorrido de 600 metros e 9 obstáculos.

O concello de Ames acolle un ano máis a segunda proba do circuíto de ciclismo de montaña Transgalaica 2025. Este domingo, 16 de marzo, será a novena ocasión na que o concello acolla este evento deportivo, unha das citas con maior repercusión no mundo do ciclismo no noroeste español. Esta proba, organizada polo club ciclista amesán Os Esfola Arrós e a empresa Team Relay (Transgalaica), conta coa colaboración do Concello de Ames. A saída realizarase dende o Pazo da Peregrina de Bertamiráns ás 9:30 horas, onde comezará un circuíto de 32 quilómetros que haberá que percorrer dúas veces, facendo así en total unha proba de 64 quilómetros. Na proba están inscritos un total de 301 ciclistas. Premendo neste enlace poderás obter o aviso municipal dos cortes e da prohibición de estacionamento na avenida José Luis Azcárraga con motivo da proba.

No mes de marzo o programa Apego continúa a súa programación de propostas para as crianzas amesás. Desta volta, cun obradoiro de debuxo colaborativo impartido por As Seibas Espazo Educativo, que terá lugar o vindeiro venres 21 de marzo, ás 18.00 horas no Pazo da Peregrina de Bertamiráns. O prazo de inscrición está aberto desde hoxe, 13 de marzo, ata o vindeiro xoves día 20. Para participar, é preciso enviar un correo a normalizacion@concellodeames.gal indicando o nome e apelidos das persoas asistentes, a idade das crianzas e un teléfono de contacto.

Este mércores, 12 de marzo, a Asociación Empresarial Galega de Centros Especiais de Emprego (CESAGAL) e a Asociación de Empresas de Inserción de Galicia (AEIGA) organizaron a xornada “Compra pública responsable nas administracións locais”, un encontro dirixido a responsables municipais, profesionais do sector público e entidades de economía social interesadas en promover unha contratación pública con impacto social e ambiental. O alcalde de Ames e vogal da Comisión Executiva da FEGAMP, Blas García, participou na Mesa redonda “Desafíos e oportunidades na contratación responsable nos concellos galegos”.