A obra “Geometría del alma”, de Teatro Plus, que chegará á Casa da Cultura do Milladoiro o 18 de outubro ás 18:00 horas. Este espectáculo, dirixido a público infantil, é unha fusión entre teatro visual, danza contemporánea e manipulación de obxectos que expresan a relación entre as formas xeométricas e o corpo humano; un corpo que tratará de dar alma á xeometría para poder comprender a xeometría da alma que está no seu interior. 

O Concello de Ames, a través da Aula da Natureza, organiza este outono as xornadas “Arredor dos castiñeiros”, que se desenvolverán nos meses de setembro, outubro e novembro. Serán catro sesións centradas nos castiñeiros que contarán con charlas, obradoiros participativos e visitas a empresas de transformación de castaña. O sábado 19 de outubro celebrarase a segunda xornada, unha visita á empresa Naiciña, especializada na elaboración, transformación e distribución da castaña. Desenvolverase en horario de 9:00 a 18:00 horas e haberá servizo de autobús.

O sábado 19 de outubro a Aula da Natureza organiza a actividade “Estrelas de outono”, na que a veciñanza de Ames terá a oportunidade de avistar o cometa C/2023 A3 (Tsuchinshan-ATLAS), a constelación das Pléiades e a lúa. Está aberto a todos os públicos. Haberá servizo de autobús a disposición dos participantes: ás 19:30 horas sairá da Casa da Cultura do Milladoiro, e ás 19:45 horas do Pazo da Peregrina. O regreso será ás 22:00 horas. 

O luns 21 de outubro, ás 17:00 horas, inaugurarase na Casa da Cultura do Milladoiro a exposición fotográfica solidaria “EspadELA”. Trátase dunha iniciativa da cooperativa Arabías, con retratos da boirense Charo Lopes, que supón o punto e final de EspadELA, 8Escola de Apoderamento Feminista) un proxecto nado en 2018 para fomentar a participación das mulleres na vida comunitaria.