O Centro Deportivo Municipal da Telleira, xestionado por BeOne, permaneceu pechado máis de tres meses ao público como consecuencia da declaración do Estado de Alarma polo Covid-19. Desde o día 22 de xuño, reabriu as súas portas para os seus abonados. O obxectivo de BeOne é conseguir que o usuario siga gozando da mellor experiencia deportiva, pero con todas as garantías de saúde, seguridade e benestar.

O Centro adaptou as súas instalacións para cumprir con todas as esixencias estatais, comunitarias e locais e adoptou unha serie de protocolos propios para garantir o benestar e a seguridade. Todas as medidas adoptadas nos centros deportivos que xestiona BeOne estiveron auditadas e certificadas pola Cátedra do Deporte da Universidade Politécnica de Valencia.

Entre as medidas adoptadas cabe destacar o reforzo en hixiene, limpeza e desinfección, a toma de temperatura no acceso, a renovación constante de aire e a desinfección continua de filtros de ventilación, os puntos de desinfección de calzado e mans, o horario preferente para maiores de 65 anos ou o control de aforo para poder respectar sempre a distancia de seguridade mínima entre usuarios.

Para consultar todas as súas medidas, BeOne habilitou a páxina web www.beone.es/volvemosgal. Na zona de auga, tanto en piscinas como spa, reforzáronse ao máximo as medidas de desinfección e limpeza e contrólanse exhaustivamente os parámetros técnicos nestes espazos.

As actividades dirixidas comezarán o vindeiro luns 29 con reserva previa a través da app do centro e xa están abertas as inscricións para os cursos de verán de ioga e pilates.

Todo o persoal do centro recibiu formación en medidas de seguridade Covid-19 e en áreas específicas tanto técnicas como comerciais co fin de poder ofrecer aos abonados unha gran experiencia deportiva. BeOne compensará os servizos pagos e non gozados do mes de marzo e permitirá o acceso gratuíto dos seus usuarios que non se deron de baixa durante o peche ata o 30 de xuño.