A pavimentación de Sura fíxose sobre un vieiro de algo máis de dous quilómetros (2.010 metros de lonxitude exactamente), que está dividido en dous treitos de 310x4,50 e 1.700x3,50 metros, así como en 125 metros cadrados de sobreanchos. 

A través desta actuación mellorouse a capa de rodaxe con cinco centímetros de aglomerado en quente que se aplicou sobre toda a plataforma. Previamente reparáronse as fochancas e perfiláronse as mordentes con grava e tratamento asfáltico semiprofundo. Completaron a obra a limpeza de gabias e salvagabias para o correcto drenaxe lonxitudinal e transversal e a sinalización horizontal con pintado de liñas en bordes e símbolos. 

Plan de mellora dos camiños da zona rural

O concelleiro de Obras e Servizos Básicos, Blas García, salientou que “estas obras forman parte dun plan máis amplo que contempla ir mellorando os camiños interiores e de acceso ás aldeas do rural amesán, e que se está levando a cabo tanto con cargo a fondos da Deputación da Coruña como a fondos municipais propios”.

O concelleiro de Obras indicou tamén que “a esta actuación na parroquia da Ameixenda hai que sumarlle a xa realizada recentemente desde O Mercuto a A Folgueira, na que se pavimentou a estrada. Ademais, recentemente na Ameixenda realizouse a construción do saneamento no propio lugar de Sura, o arranxo do campo da festa, o asfaltado dunha pista no interior de O Mercuto e o asfaltado dunha pista en Quintáns”.

Ademais, durante este ano está previsto realizar a mellora do asfalto da estrada que vai de O Mercuto ata O Vilar, na que se construirán unhas sendas peonís de seguridade. 

Para o alcalde de Ames. José Miñones, a obra pon de manifesto que “este Goberno está concienciado coa importancia que ten o rural amesán, e por iso estamos a realizar unha clara aposta pola mellora dos nosos núcleos e os seus accesos".