Este luns, 1 de marzo, comezou o curso de segundo nivel do obradoiro que se celebrou en febreiro, o de procesador de textos con LibreOffice Writer II, que se impartirá ata o 5 de marzo, de 17.30 a 19.00 horas. Trátase dun curso de nivel medio no que se afondará no uso do procesador de textos aprendendo a manexarnos con campos automáticos, cabeceira e rodapé, formato de páxina, FontWork, sinaturas dixitais...

Dende o luns 8 ata o venres 12, impartirase o obradoiro de folla de cálculo con LibreOffice Calc I, de 17.30 a 19.00 horas. Nel, os alumnos e alumnas, aprenderan conceptos básicos de introdución ás follas de cálculo: interface de LibreOffice Calc, introdución de datos e formatado numérico, formato condicional, funcións básicas e funcións con condicións.
O nivel medio deste curso terá lugar a semana do 15 ao 18 de marzo, de 17.00 a 19.00 horas. Nesta ocasión afondarase no uso das follas de cálculo: función condicional SE, funcións aniñadas, creación de gráficas, impresión das follas de cálculo, conxelación de filas e columnas, ordenar e filtrar...

O luns 22 de marzo comezará o curso de presentacións con LibreOffice Impress. Rematará o venres 25 e impartirase de 17.30 a 19.00 horas. Trátase dunhas clases de introdución ata o nivel medio de creación de presentacións con Impress: peculiaridades das presentacións, interface do programa, inserción e formatado dos elementos (cadros de texto, imaxes, FontWork, táboas, gráficas, vídeos...), animación e interacción das diapositivas, manexo de plantillas...

Curso para nenos e nenas
Os días 29, 30 e 31 de marzo, coincidindo coas vacacións escolares de Semana Santa, a Aula CeMIT organiza un curso virtual para nenos, nenas e adolescentes.

A través de Youtube, en horario de 10.30 a 12.00 horas, poderase asistir ao obradoiro de Scratch, unha linguaxe de programación por bloques moi visual e adecuada para que os rapaces e rapazas comecen a usar a lóxica da informática na programación, para que despois se interesen pola robótica educativa.

Este obradoiro de Semana Santa pódese seguir dende a casa ben sexa en solitario ou coa compañía da familia para aprender todos xuntos.

Como anotarse e asistir virtualmente
Para poder inscribirse precísase un ordenador co software necesario (LibreOffice) e conectado á rede para poder seguir a retransmisión en directo dende YouTube. Estes cursos mesturan sesións explicativas con prácticas titorizadas para facilitar o aprendizaxe.

Para inscribirse nalgunha das actividades será preciso estar rexistrado de balde na rede CeMIT. Para máis información ou facer a reserva podes acceder á aula no primeiro andar da Casa da Cultura de Bertamiráns ou poñerte en contacto a través do número teléfono: 682 373 753 ou do enderezo de correo electrónico: cemit.ames@xunta.gal

Unhas horas antes do comezo de cada curso recibiredes por correo electrónico a información necesaria para acceder a cada sesión.

Ao pé desta nova podes consultar todos os días e horarios de realización dos cursos, ademais das horas de Aula Aberta da aula CeMIT.

Horario de Aula Aberta
O horario de Aula Aberta é de luns a venres, de 9.30 a 13.30 horas. Para poder empregar os ordenadores durante a Aula Aberta hai que respectar as seguintes medidas de hixiene:

-Limpeza de mans antes de empregar calquera equipo.
-Uso obrigatorio de máscara hixiénica.
-Manter a distancia de seguridade de metro e medio.

Os 8 equipos dispoñibles están numerados e as súas distancias acotadas, polo que é moi importante respectar as medidas en todo momento. Entre cada uso o responsable da aula fará a desinfección correspondente para garantir a seguridade dos seguintes usuarios.