Con motivo da celebración do Día mundial da Saúde a Concellaría de Benestar Social e Promoción da Saúde organizou para este xoves, 7 de abril, ás 17.30 horas, dúas andainas simultáneas que partirán dende os centros de saúde de Bertamiráns e do Milladoiro. As persoas participantes nestas andainas percorrerán parte da Senda Verde ata chegar á igrexa de Bugallido, onde se atoparán e tomarán un aperitivo, para de seguido regresar en autobús ao punto de partida.

As persoas que partan dende o centro de saúde de Bertamiráns percorrerán uns 5 quilómetros, mentres as que saían dende o centro de saúde do Milladoiro terán que camiñar un pouco máis, 5 quilómetros e medio. Estímase que a duración das andainas será de arredor dunha hora e cuarto ou hora e media. As persoas que participen nesta actividade irán acompañadas dun monitor de marcha nórdica, que instrúe ás persoas que desexen voluntariamente practicar esta modalidade. Estas andainas teñen unha dificultade media-baixa.

Para participar nestas andainas non é necesario inscribirse previamente. Tan só hai que estar diante do centro de saúde de Bertamiráns ou do Milladoiro un pouco antes do inicio das andainas. Polo tanto, haberá que estar arredor das 17.20h, para comezar ás 17.30 horas. Estas andainas enmárcanse dentro do programa municipal SaúdeAndo, que se leva desenvolvendo dende o pasado mes de xaneiro e inclúe un total de 38 andainas ao longo de todo o ano.

Novas relaciondas:

El Correo Gallego: "Cinco quilómetros de andaina saudable dende os dispensarios este xoves"