Ames conta dende onte con dúas novas medallas do Concello, despois de que o ex alcalde José Miñones e o ex concelleiro Ramón García Argibay recibisen este recoñecemento polo seu labor como integrantes da Corporación municipal. Ao acto asistiron as dúas persoas homenaxeadas e a Corporación municipal ao completo, acompañados do ex alcalde de Ames, José Astray; as catro medallas do Concello de Ames, Filomena Fraga, Maximino Viaño, Ramón Lorenzo e Ángel Carracedo; Juan Crespo, presidente da Protección Civil de Ames; Maximino García, da Policía Local de Ames; Juan Lemos, presidente da Xunta de persoal do Concello de Ames; Rubén Ramos e Maite Arufe, do Comité de empresa do Concello de Ames, e o funcionariado habilitado, así como familiares e achegados dos dous homenaxeados.

O alcalde de Ames, Blas García, abriu o acto de agradecemento celebrando “o traballo realizado de dúas persoas que formaron parte desta Corporación durante moitos anos, e que polo tanto traballaron polas veciñas e veciños deste concello, algo moi importante e que non se valora en ocasións, pero os que estamos na política local temos que poñelo en valor”.

Intervencións dos voceiros e voceiras dos grupos municipais

A intervención do alcalde deu paso aos voceiros dos grupos da Corporación municipal. O concelleiro do grupo mixto, José Ramón Oulego, de Ciudadanos, quixo recoñecer o labor dos homenaxeados “deixando de lado as discrepancias políticas”. “Hai que recoñecer a súa implicación constante e a súa gran dedicación. Deixaron pegada na Corporación e dignificaron a función política”.

Pola súa banda Quique Costas, de Ames Novo, agradeceu o traballo ao longo dos anos na Corporación de Argibay, do que sinalou que “como veciñanza debémoslle un agradecemento fondo ao seu labor e aos seus moitos anos de entrega”, e de Miñones, “alégrome de ver o éxito na túa traxectoria, desexo que teñas moito éxito como Delegado do Goberno”.

A voceira de Contigo Podemos, Genma Otero, destacou “o tempo e a implicación, o esforzo que conleva a política”, nun “día de ledicia acompañada de compañeiros, amigos, veciños, e traballadoras do concello”, resaltando que “o Concello de Ames será sempre a vosa e a nosa casa, e dende logo a casa de todos e todas”.

Continuou a quenda de intervencións o voceiro do BNG, David Santomil, que agradeceu a dedicación e o traballo dos ex-concelleiros. “Aquí estamos todos e todas de paso para intentar aportar o mellor de cada un de nós, e creo que o proxecto prevalece. Ames é referencia hoxe en día en moitos aspectos”.

A voceira do Partido Popular, Oliva Agra, quixo “valorar a dúas persoas que deixaron pegada no concello”, persoas “con ideoloxías distintas, con formas de traballar diferentes, pero coa mesma base, que é dedicar o seu tempo aos demais”. “Non existe unha única forma de traballar, e iso é un valor, a diversidade. Quen queira saber o que é a pluralidade, a tolerancia, a solidariedade, quen queira vivir unha sociedade aberta, que mire a Ames”.

Pechou as intervencións dos grupos políticos a voceira do PSdeG, Luisa Feijóo, que destacou a dedicación pola política municipal dos homenaxeados. “Temos aquí diante nosa dúas persoas que a pesar de ter ideoloxías distintas comparten algo digno de admirar. Se agora mesmo a condición de político está denostada, se alguén dignificou a política neste concello foron eles, pola súa capacidade de traballo polas veciñas e veciños”.

Entrega das medallas do Concello de Ames a Ramón García Argibay e José Miñones

Co remate das intervencións, e entre a actuación do músico Marcos Valcárcel, o ex concelleiro e o ex alcalde recibiron as súas respectivas medallas por parte do alcalde de Ames, Blas García. Ramón García Argibay foi o primeiro en recibir o recoñecemento do Concello de Ames. “Non podo mostrar máis que agradecemento, moitas grazas ao alcalde e a todas as persoas que dalgún ou outro xeito están dando un pulo a este concello, todos sodes imprescindibles. Ao Delegado do Goberno, cando foi o seu nomeamento encheunos a todos de ledicia. Ao ex alcalde, José Astray, que para min sempre foi un referente, e a Alfonso Rey, que nos marcou a todos no Partido Popular de Ames. A traxectoria das persoas inflúe sempre na vida municipal, a política máis importante de todas e da que nunca quixen marchar”.

Por último, Argibay destacou o respecto mutuo e a cordialidade ao longo do seu paso pola Corporación municipal. “Neste concello durante moitos anos, fóra das rivalidades políticas sas, sempre se gardou o respecto e a confrontación enriqueceu. O que si que hai neste concello son boas persoas, independentemente de como pense un ou outro. Grazas a todos os membros da Corporación e do Partido Popular, foi un pracer traballar convosco. Pedir desculpas polos erros que cometeramos, foron motivados pola lealdade ao Concello de Ames”.

En segundo lugar, foi o Delegado do Goberno e ex alcalde de Ames, José Miñones, o que recibiu a súa medalla. “Moitísimas grazas a todos os que estades hoxe aquí, en especial as nosas catro medallas do Concello. Foron doce anos e medio onde tiven experiencias de todo tipo, estar como concelleiro, na oposición e como alcalde durante seis anos e medio, a maior honra. Ademais tiven a fortuna de chegar a alcaldía tras pasar pola oposición, algo moi importante para ter esa outra mirada, a de que os doutro lado fan oposición coa máxima dedicación e esforzo, ao igual que as concelleiras e concelleiros do Goberno”.

Para concluír, Miñones insistiu na importancia do “recoñecemento” ao labor dos políticos e políticas municipais. ”Dedicámonos á xente, dedicamos moitas horas, levamos os problemas a casa, durmimos co telefono acendido, e creo que é unha dedicación que merece ser recoñecida. Dar grazas a todo o persoal, nós marchamos pero eles quedan ao fronte para sacar os asuntos adiante, tamén nas discrepancias e nos momentos malos. Agradecer a todos os concelleiros que coñecín ao longo dos doce anos, en especial aos grupos do trigoberno de ambas lexislaturas, fomos quen de poñer Ames por diante, deixando a un lado as siglas, e esa é a fórmula que sigue funcionando”.

Para pechar o acto de agradecemento, o alcalde de Ames, Blas García insistiu en poñer en valor e “dignificar a política”. “Que isto sirva sobre todo para dignificar ás persoas que nos dedicamos á isto, xa sexan os 14 anos e medio de Ramón ou os 12 anos e medio de José no concello, porque non é fácil estar aquí. Calquera persoa que queira ser política debería pasar pola política local, porque é algo totalmente distinto. É onde estas en contacto cos veciños, onde coñeces a sua realidade, onde os tes que atender si ou si, aprender a escoitalos e a darlles solucións. Estou moi orgulloso de ser alcalde de Ames e desta Corporación. Somos un exemplo que debemos exportar, nesta maraña política na que pos a televisión e se ven enfrontamentos constantes”.

Novas relacionadas:

La Voz de Galicia: "Ames agradece a José Miñones y a Ramón Argibay su larga trayectoria en la corporación"

Enfoques: "El ex alcalde José Miñones y el ex concelleiro Ramón García Argibay, condecorados con las medallas de Ames"

AMSGO!: "Medallas do Concello para José Miñones e Ramón García Argibay"