Malia que as reservas de auga dos encoros continúan nunha situación estable, os caudais dos ríos continúan por debaixo da media neste verán de 2022, que nos últimos días está a deixar unha vaga de calor excepcional, marcando récords de temperaturas máximas e mínimas ao longo do país. Neste senso, a auga que se consume no concello de Ames é captada do río Tambre, que de momento non sofre problemas de seca, mais cómpre manter a prudencia e a responsabilidade ao longo desta época estival.

Con este obxectivo, o Concello de Ames lanzou a comezos de xuño a campaña “Augaconsellos”, unha serie de recomendacións e medidas para animar á veciñanza a facer un uso responsable e moderado da auga. A través desta campaña achéganse varios “augaconsellos”, como usar a ducha en lugar do baño; usar a lavadora chea; limitar o enchido de piscinas; non empregar o váter como papeleira; racionar a auga para o rego; optimizar o lavado de vehículos; revisar posibles fugas de auga; pechar a billa mentres se lavan os dentes, ou limitar o baldeo e limpeza das rúas.

Deste xeito, e dende que arrincou a campaña, o consumo diario de auga no concello de Ames viuse reducido nun 5,36%, o que supón un recorte de 283,4 metros cúbicos con respecto ao ano anterior. A maior baixada deuse en Bertamiráns e na súa contorna, onde o uso de auga baixou un 10% ata os 2.000 metros cúbicos diarios, un aforro de máis de 220.000 litros. Por outra banda, O Milladoiro e os seus arredores recortou o consumo nun 2%, baixando aos 3.000 metros cúbicos por día, uns 61.000 litros menos por xornada menos que antes do comezo da campaña.

Ademais dos esforzos da veciñanza, dende o propio Concello tamén se adoptaron unha serie de medidas para reducir o consumo de auga, como controlar e reducir o rego dos xardíns e das zonas verdes municipais públicas. Ademais, a empresa Urbaser, concesionaria do servizo municipal de limpeza viaria, reduciu a cantidade de auga potable que gasta nos baldeos e servizos de limpeza que realiza polas rúas, beirarrúas e nas prazas municipais.

A implicación e participación veciñal no coidado deste recurso é imprescindible para acadar un bo resultado e por iso o Concello de Ames fai un chamamento á moderación e á responsabilidade no consumo de auga. Neste senso a vindeira semana publicarase un bando municipal para incentivar que a veciñanza amesá reduza o consumo de auga.

Neste senso pronunciouse o alcalde de Ames e concelleiro de Servizos Básicos, Blas García. “De seguir este tempo pode haber problemas coa auga despois de verán, polo que é importante que a veciñanza se implique e siga estes consellos. Son pequenos detalles que ao final se todos e todas os facemos acaban sendo un aforro importante. O caudal do río Tambre é baixo e podemos chegar a situacións no mes do setembro no que teñamos que facer restricións no subministro, por iso é necesario concienciarse e facer un esforzo para aforrar auga”.

Novas relacionadas:

La Voz de Galicia: "Ames rebaja un 5,36 % el gasto diario de agua tras la campaña municipal «Augaconsellos»"

El Correo Gallego: "Augaconsellos para evitar un gasto innecesario ante a vaga de calor deste verán"