Este venres, 22 de marzo, o auditorio da Casa da Cultura do Bertamiráns acolle a obra “Esas cousas marabillosas” ás 20:30 horas. Este é o sétimo dos 12 espectáculos que integran a programación de artes escénicas “Ames Cultural 2024”. Deste xeito, o Concello de Ames propón para este venres teatro dirixido a público adulto.

Sinopse de “Esas cousas marabillosas”
A obra comeza cando o público vai entrando na sala e é recibido polo actor protagonista. Dálles a benvida, axúdaos a se acomodar, e dálles un papeliño que vai xogar no espectáculo. Cando empeza o espectáculo, o público xa leva un cacho dentro del sen sabelo e algúns cun papeliño na man.

Cóntase unha historia de case tres décadas que comeza cando… mamá está no hospital: «Fixo unha parvada”, di papá, porque: “resúltalle difícil ser feliz”. Esta primeira tentativa de suicidio de mamá fai que o fillo (o protagonista), de sete anos daquela, comece a facer unha lista de todo o que é marabilloso no mundo. Todo polo que vale a pena vivir. Deixa a lista na almofada de mamá co titulo “Todas esas cousas marabillosas”… Mamá leuna, sábese porque corrixiu a ortografía.

Con moitos personaxes e moitas situacións, que se desenvolven ca axuda e a complicidade necesarias do público, constrúese esta peza tenra e emocionante sobre a depresión e ata onde chegamos pola xente a que amamos.

Empatía Teatro
Empatía Teatro nace en 2021 da man do actor e publicista galego Elisardo de la Cruz. Tras o seu paso pola Escola Municipal de Arte Dramático de Madrid, Teatro do Andamio, Bartoleta Teatro e a Escola de Formación de Actrices e Actores de Narón, “Esas Cousas Marabillosas” é a sua primeira produción profesional.