- Tematica
A Aula da Natureza, dentro da súa programación de outono, organizou tres obradoiros denominados “Doce Outono”, para promover o aproveitamento sostible dos alimentos. Estas actividades, que estiveron dirixidas a nenos/as e adultos, organizáronse os días 21 e 28 de setembro e mailo 5 de outubro. Deste xeito, hoxe impartiuse o último deste obradoiros no que os participantes aprenderon a elaborar marmeladas, confituras e chutneys. Nestas tres sesións participaron un total de 65 persoas, completando todas as prazas ofertadas.
Hoxe 5 de outubro, as instalación da Aula da Natureza acolleron o terceiro e último obradoiro de “Doce Outono”, incluído na programación da Aula da Natureza para o último trimestre do ano. Tratouse dun obradoiro para aprender a elaborar marmeladas, confituras e chutneys. Nesta actividade participaron 15 adultos. Esta actividade foi impartida polo persoal do obradoiro de cociña Hello Cooking. Deste xeito, impartiuse un obradoiro practico onde os participantes cociñaron, envasaron e etiquetaron as preparacións elaboradas seguindo receitas dunha conservación segura.
Previamente, o pasado 28 de setembro impartiuse un obradoiro de cosmética con mel de Galicia. Nesta actividade participaron 20 persoas adultas que fixeron unha breve introdución teórica dos recursos aproveitables da colmea; elaboración de tintura de própole; xabón de glicerina con mel, polen e tintura de própole; crema corporal con mel; ungüento reparador; e unha cara de mel.
Tratouse dun obradoiro moi práctico no que ao final da actividade todos os asistentes levaron as súas creacións para casa e co que se pretendeu achegar aos participantes ao mundo natural, da saúde e do respecto ao medio ambiente, podendo aplicar os coñecementos no fogar ou comezar un novo negocio e enfoque de vida. Este obradoiro foi impartido por persoal da empresa Baumé, que conta con formación especializada acreditada no campo educativo e cosmético, con ampla experiencia no desenvolvemento de produtos cosméticos no mercado actual, no desenvolvemento de marcas e no campo educativo.
Para o público infantil impartiuse un obradoiro de marmelos e confitura, o pasado 21 de setembro, no cal participaron 30 nenos e nenas de 6 a 14 anos. A rapazada participou nunha ruta para coller froita, e posteriormente, aprendeu a elaborar doce de mazá e confitura de moras. A través destas actividades promoveuse o aproveitamento sostible dos alimentos.
Novas relacionadas:
La Voz de Galicia: "Los últimos talleres del Aula da Natureza de Ames contaron con la participación de 65 personas"
El Correo Gallego: "Los amienses aprenden a preparar y envasar mermeladas y a elaborar cosméticos con miel"
