A XVII Carreira Ciclista do Pavo celebrarase o domingo, 22 de decembro, con motivo das festas do Nadal. Dará comezo ás 11.00 horas con xincanas ciclistas para os máis pequenos. No caso de que queiran participar en triciclo, ou con axuda das dúas rodas pequenas, tamén o poden facer, e a propia organización axudará dispoñendo do material. Xa ás 12.00 horas iniciarase a carreira, na que poderá participar calquera persoa de 15 anos en adiante, tanto si está federada como se non. É obrigatorio o uso de casco en ambas.

O circuíto da carreira terá un trazado urbano e circular, tendo como punto de partida e remate as inmediacións do paseo fluvial de Bertamiráns. Daranse 30 voltas aproximadamente. Só hai unha categoría, polo que os primeiros que cheguen a meta recibirán un pavo, un polo e unha perdiz, nesa mesma orde, tendo como maior ou menor valor o seu tamaño.  Cómpre engadir que non se trata de animais vivos.

As inscricións para os/as ciclistas federados/as poden facerse na páxina web da federación (tamén o poden facer o propio día da carreira), mentres que os/as persoas non federadas teñen que enviar un correo electrónico a begonaalonso@mundo-r.com ou chamar ao  número de teléfono 677 555 748. Em ambos casos as inscricións poden tramitarse ata o venres 13 de decembro.