Da man de Lupe Blanco, Josinho da Teixeira, Nuria das Cruces, O Rabelo e Xairo de Herbón, o alumnado de 5º e 6º de primaria e da ESO estivo a afondar nos xéneros galegos de improvisación oral en verso. O obxectivo é incentivar o emprego da regueifa nas aulas. Por unha banda, para enriquecer a práctica educativa e o desenvolvemento cultural, emocional e colectivo do alumnado, e por outra, especialmente, para promover a normalización da nosa lingua, sendo o ámbito educativo e cultural claves para manter vivo o galego entre as novas xeracións.

Ademais, as actividades formativas nos colexios e institutos procuran fomentar tamén a participación no certame de regueifas en vídeo que organiza o Enreguéifate. O prazo de inscrición na que será a oitava edición estará aberto do 20 de xaneiro ao 20 de marzo de 2025. Para anotarse é preciso enviar un ou máis vídeos, cunha duración máxima de 3 minutos, nos que aparezan cando menos 2 persoas regueifando sobre un tema libre. As bases completas poden consultarse na páxina web do certame (www.enregueifate.gal), a través da cal tamén poderá facerse a inscrición no vindeiro mes de xaneiro.

Co lema Enreguéifate, puro magnetismo!, esta nova edición volverá contar con dúas categorías: xeral, para calquera persoa, e escolar, para alumnado dos centros educativos galegos non universitarios. Como novidade, este ano amplíanse de seis a oito os premios por cada unha delas. Así, amais dos xa tradicionais galardóns para a regueifa máis brava, máis aguda, máis diversa, máis reivindicativa, mellor cantada e mellor falada, este ano tamén haberá premios para a regueifa máis inclusiva e a máis entroideira.

Os regueipremios entregaranse nunha gala que se celebrará o luns, 19 de maio de 2025 no Auditorio de Galicia, en Santiago de Compostela. Unha cita que este ano volverá ser un fin de festa conxunto dos proxectos Enreguéifate e Regueifesta e que reunirá preto dun milleiro de escolares de toda Galicia, alumnado de centros educativos de Euskadi e público xeral.