O Concello de Ames, a través da Concellería de Cultura, presentou a semana pasada a nova programación de "Animación á lectura", que se desenvolverá durante o último trimestre de 2020.

Parte deste programa está adicado aos máis pequenos cuns obradoiros infantís dirixidos a nenos e nenas de 8 a 12 anos. A primiera destas actividades será a de  "Creacontos", que se realizará este venres 23 de outubro, ás 17.30 horas, na biblioteca do Milladoiro e o sábado 24, ás 11.00 horas, na de Bertamiráns.

Trátase dun obradoiro creativo no que empregarán todas as vertentes posíbles á hora de contar un conto. É dicir, os pequenos e pequenas xogarán, falarán, escribirán e farán manualidades. Des xeito preténdese aproveitar ao máximo os contos contados e entendidos de maneira tradicional.

O prazo de inscrición estará aberto ata o martes 20 de outubro. Para obter unha das 9 prazas ofertadas, débese chamar ao número de teléfono 981 530 807 ( biblioteca do Milladoiro), ao 981 884 829 (Bertamiráns) ou enviar un correo electrónico ao enderezo biblioteca@concellodeames.gal.

Todas as actividades realizaranse tendo en conta todas as normas de seguridade e hixiénico-sanitarias marcadas polas autoridades sanitarias.

As actividades para crianzas continuarán durante o trimestre co mesmo aforo estipulado. A seguinte será "Autores con pegada", o venres 20 e sábado 21 de novembro ( o prazo de inscrición estará aberto dende o día 9 ao 17 de novembro). Por último, en decembro, desenvolverase o obradoiro "Decora o teu Nadal" o luns 21 e martes 22 de decembro.  A esta actividade poderase anotar a partir do luns 7 ata o 10 de decembro.