O vindeiro luns, 2 de outubro, dá comezo un novo curso da Escola de Saúde, que, por segundo ano consecutivo, ofrece clases de taichi tradicional e de chi kung. As actividades impartiranse en espazos exteriores: na contorna do pavillón deportivo do Milladoiro os luns e mércores de 17:00 a 18:00 horas, e nos xardíns do Pazo da Peregrina de Bertamiráns, os mércores e venres de 10:00 a 11:00 horas.

O taichi é apto para todas as idades e de intensidade regulable. Serve para corrixir, nutrir e fortalecer a estrutura de quen o practica. Mellora a forza-resistencia, a flexibilidade, o equilibrio, a coordinación e a memoria. Tamén serve para mellorar a circulación e a función orgánica, calmar a mente e equilibrar o estado emocional a través do desenvolvemento da atención plena.

Por outra banda, o chi kung é un sistema de desenvolvemento persoal para mellorar a saúde. Combina movementos suaves do corpo con relaxación e respiración lenta. Mellora a flexibilidade, a conciencia corporal e a concentración. Con nesta actividade física, o organismo énchese de enerxía e esta flúe polo corpo aumentando a nosa vitalidade. Consegue unha relaxación na que a persoa se volve consciente dos nosos movementos, do noso interior e do contacto coa contorna. En China é moi practicado e apreciado polos seus beneficios no campo da saúde.

Chi kung significa control, dominio ou arte da enerxía. As súas metas xerais son saúde, boa forma física, lonxevidade e cultivo das facultades persoais. O chi kung é unha ximnasia enerxética que fortalece o corpo e a mente, distribuíndo de forma equilibrada a enerxía. O ideal é practicalo nun espazo aberto, na natureza.