O ciclo "Cine con nome de muller" é unha iniciativa organizada polo Concello de Ames que conta coa colaboración de Zenit TV e Minervas Voice, e que pretende poñer en valor a vida dalgunhas mulleres galegas que foron pioneiras en distintos ámbitos nos dous últimos séculos a través do cine. A programación dá comezo o día 13 de abril coa proxección de "Emilia Pardo Bazán, a condesa rebelde", que relata a vida da escritora, intelectual e xornalista galega, que abandeirou unha vida en igualdade de condicións cos seus coetáneos. Será ás 20:30 horas, no auditorio da Casa da Cultura do Milladoiro. Os convites, de balde, poden descargarse na Billeteira electrónica do Concello de Ames.