“As desterradas”, unha peza da compañía Producións Teatrais Excéntricas, é unha obra escrita por Carme Varela (25º Premio Álvaro Cunqueiro para textos teatrais), conta como unha comunidade de monxas á beira do río Miño vense ameazadas pola xerarquía eclesiástica. Deste xeito, nárrase unha historia de resistencia e poñer en valor a loita destas mulleres.

No século XVI unha pequena comunidade de monxas á beira do Miño vese ameazada pola cobiza da xerarquía eclesiástica. Os señores da Igrexa, para rematar coa resistencia das freiras non dubidan en difamalas e ameazalas por todos os medios, desde o tribunal da inquisición á violencia das mesnadas señoriais. Carme Varela reconstrúe nun thriller conventual aqueles tempos de resistencia das comunidades de mulleres autosucientes e poderosas.

A vida parece continuar coas súas rutinas de rezos, bordados e melindres, mais a negra sombra da ameaza exterior abátese sobre o convento de Albeos. A obra de Carme Varela foi un fenómeno editorial singular. Chegou ás cinco edicións nun ano, insólito para un texto teatral.