A terceira presentación do mes de xuño será este mércores, 15 de xuño, con Manuel Portas e o seu libro “Unha cervexa Chang”. Trátase dun libro que narra como ás veces cando temos un problema que non sabemos como resolver, cómpre afastarse da realidade e contemplala a distancia. E isto é o que fai Daniel, o protagonista protagonista desta novela, que en plena crise persoal e económica decide aproveitar as vacacións de Nadal para descansar lonxe, nunha praia paradisíaca de Tailandia. Só para iso, para que as ameazadoras circunstancias que o abafan, un matrimonio fracasado, un negocio de antigüidades en decadencia, unha familia que lle reclama responsabilidades desmedidas e unha ansia de liberdade que xa parece ilusión, queden un tempo á marxe e deixen albiscar un horizonte novo.

Mais, cando xa está a piques de volver para a casa, aos serios problemas do negocio familiar e á súa contraditoria vida sentimental súmaselle un acontecemento inesperado que vai complicar aínda máis a súa maltreita existencia.

Manuel Portas é profesor de lingua e literatura no Instituto Xelmírez I de Santiago, do que é o seu director. Alén da colaboración en obras de carácter didáctico e publicacións pedagóxicas, é coñecido polo seu labor no campo da análise sociolingüística, onde salienta Língua e sociedade na Galiza (1990), obra sobranceira da sociolingüística galega. Denso recendo a salgado (2010) foi a súa primeira novela. Seguírona Un dedo manchado de tinta (2011), Faneca Brava (2013) e Amor en alpargatas (2015). Con Lourenço, xograr obtivo o Premio García Barros en 2015. No acto de presentación Manuel Portas estará acompañado polo autor, investigador e crítico Xosé Antonio López Silva; pola concelleira de Cultura, Natividade González e polo alcalde de Ames, Blas García.