O grupo municipal de teatro de Ribeira pon en escena este novo espectáculo de humor en verso no que participa un reparto composto por un grupo de actrices e actores baixo a dirección de Óscar Romero. Unha comedia con moitos enredos e bastante retranca, coa intención de conseguir que o público esqueza os seus problemas diarios e goce do teatro, do humor e da sátira para rematar esmendrellándose coa risa. Os numerosos personaxes, tanto no escenario como no patio de butacas, van facendo escenas pícaras e irónicas chegando nalgúns momentos a interactuar co público asistente; damas da Corte, o bufón que está canón, a raíña trepas, as princesas que aspiran chegar ao trono, un marqués pelotas e un capitán algo especial forman este enredo xunto co Rei, un monarca pouco habitual que, con bo humor e dende o respecto, fará as delicias do respectable na súa busca incansable de atopar unha raíña para asegurar o seu liñaxe... pero iso non é o que el quere no fondo, senón que é unha imposición da sociedade. Por que non o deixan ser feliz? Ambientada no medievo goza dun vestiario espectacular, dunha escenografía que combina elementos tradicionais e novas técnicas de luz e son para unha posta en escena final que non deixará a ninguén indiferente.

As entradas poden adquirirse xeito gratuíto na Billeteira electrónica. No caso de haber billetes dispoñibles, tamén se poden coller o propio día do espectáculo na Casa da Cultura do Milladoiro.