[26-04-2011] Onte pola mañá celebrouse un Pleno Extraordinario na Casa do Concello para tratar un único punto. A sesión plenaria durou pouco máis de quince minutos e nela procedeuse ao sorteo de xeito aleatorio das persoas que ocuparán as 36 mesas electorais que haberá en Ames nas próximas eleccións municipais, que terán lugar o domingo 22 de maio. Respecto ás anteriores eleccións hai tres mesas electorais máis, pasando de 33 a 36, debido ao aumento do censo durante os últimos catro anos. Un total de 21.510 persoas poderán votar en Ames (21.402 españois e 108 estranxeiros con dereito a voto). O alguacil municipal xunto coa Policía local serán os encargados de notificarlle a cada persoa que saíu elixida para formar parte dalgunha das mesas electorais. Cada mesa electoral estará formada por nove persoas.
Máis de 21.000 persoas están chamadas ás urnas en Ames nas vindeiras eleccións municipais de 2011. Onte pola mañá, ás 9:00 horas, celebrouse unha sesión plenaria que serviu para elixir ás persoas que ocuparán as 36 mesas electorais do Concello de Ames nas próximas eleccións municipais, que se celebrarán o día 22 de maio. Este proceso levouse a cabo de xeito aleatorio e para iso empregouse un sistema informático no que se meten todas as persoas censadas con dereito a voto que hai no municipio amiense e de xeito automático procédese ao sorteo para determinar os integrantes das mesas electorais.
Nestas eleccións haberá tres mesas electorais máis debido ao aumento do censo que se produciu en Ames durante os últimos catro anos. Deste xeito serán 36 as mesas que haberá no municipio amiense o próximo día 22 de maio. O Milladoiro será o núcleo que contará cun maior número de mesas electorais ao ser a localidade con maior número de poboación con dereito a voto. Deste xeito, Milladoiro conta con 8.412 electores e 12 mesas electorais, mentres que Bertamiráns dispón de 9 mesas electorais e 5.627 electores.
A estas eleccións están chamados un total de 21.510 electores (21.402 españois e 108 estranxeiros con dereito a voto), 2.953 máis que nas eleccións de hai catro anos xa que naquel momento puideron exercer o seu dereito de voto 18.557 electores.
Durante as próximas datas o persoal do Concello de Ames notificaranlle a todas as persoas que saíron elixidas que mesa electoral teñen que ocupar. Os encargados de realizar as notificacións serán o alguacil municipal e os axentes da Policía local. Cada mesa electoral estará formada por nove persoas. No caso de que sexa imposible a notificación e localización dunha determinada persoa pasarase a seguinte da lista e esta irá correndo en función das persoas que non sexan localizadas.
Distribución das mesas electorais
Comezando polo noroeste do concello, aos veciños e veciñas censados en Agrón correspóndelles votar no teleclub do campo da igrexa desta parroquia. Todo Lens e todo Trasmonte comparten como colexio electoral a antiga escola de Trasmonte. A xente de Piñeiro acudirá votar tamén á antiga escola unitaria desta parroquia.
No caso de Ames os recintos divídense dependendo dos lugares de residencia dos votantes. Así, os electores e electoras de Oca, Seares de Abaixo, Seares de Arriba e de Tapia, terán que acudir ao local social de Tapia, situado en Frenza. A xente de Barouta, Carreira, Cruxeiras, Lamas, Outeiro, Quintáns e Pedrouzos-Vilar votarán na escola de Cruxeiras. Por último, as persoas censadas en Augapesada, Castiñeiro de Lobo, Proupín, Castelo, Pousada, Pegariños, Padrón e Pedras teñen asignado o colexio electoral do teleclub de Augapesada.
Da outra banda da estrada toda a xente de Covas terá que achegarse á urna da escola infantil para depositar o seu voto. Os electores de Ameixenda votarán no teleclub da parroquia. Se nos trasladamos a Bugallido, atopamos que os electores de Barreiro, As Buceleiras, Eirapedriña, Framán, Guimaráns, O Instrumento, Mourigade, O Outeiro e Quistiláns teñen asignado como lugar para votar o local social de Guimaráns. Os de Firmistáns e Tarrío votarán na antiga escola de Firmistáns.
En Ortoño atopamos tres grandes áreas con distintos destinos á hora de votar. A xente de Bertamiráns -incluídos os lugares do Casaliño, O Pedregal, Castrigo, Cantalarrana, Carballido e A Condomiña- votará ao completo na Casa da Cultura, situada na praza de Chavián. A urbanización Aldea Nova ten asignado o local social. Os arredores de Bertamiráns -A Igrexa, As Cortes, O Instrumento, Lapido, Maguxe, Ortoñiño, As Punxeiras Altas, A Tarroeira, Sisalde e O Santo- votarán na escola infantil da Tarroeira.
Esta división urbano-periurbano tamén se lle aplica á parroquia de Biduído, na que se asenta o núcleo do Milladoiro. Todos os censados deste lugar terán que depositar o voto na mesa que lles corresponda do pavillón polideportivo municipal da Travesía do Porto. Ventín, Coira, Fraíz, A Moniña e O Paramuíño teñen asignado o colexio de Ventín. Biduído de Abaixo, Biduído de Arriba, Casanova, Costoia, Framil, A Agrela, A Igrexa, Raíces, As Mimosas e Millalar terán que votar na antiga escola de Biduído de abaixo.