[27-01-2014] O Concello de Ames está levando a cabo nas últimas xornadas as tarefas de acondicionamento das zonas axardinadas do polígono Novo Milladoiro co obxectivo de eliminar a maleza existente e de acondicionar os espazos verdes do parque. En total, o Concello de Ames destinará a estes traballos máis de 10.400 euros e actuará nunha superficie de 15.000 metros cadrados.
Os traballos que se están realizando inclúen o desbroce de elementos vexetais situados nestas áreas axardinadas entre os que destaca a poda de setos, palmeiras, plantas e arbustos. Ademais, estase acometendo a tala do arborado que se atopa situado baixo liñas de alta tensión. As tarefas de acondicionamento de zonas verdes tamén levan aparellada a limpeza de pavimentos e recorte de hedras. Neste conxunto de tarefas tamén se inclúe o acondicionamento das rotondas situadas na rúa Castiñeiras.
Os operarios están traballando nas tres principais áreas verdes existentes no polígono, acometendo o seu desbroce e a poda xeral de plantas e arbustos. Tamén se está realizando o recorte de hedras, despexando os camiños e procedendo á limpeza de taludes. Ademais, levase a cabo a poda do seto falso de loureiro existente na zona a unha altura de 1,80 metros aproximadamente.
Todos estes restos vexetais serán recollidos e tratados mediante diferentes sistemas. Deste xeito, levarase a cabo o triturado mediante máquina dos elementos vexetais de pouco diámetro, mentres que os troncos serán recollidos en colectores para a súa posterior reciclaxe. Ademais, recolleranse os residuos sólidos urbanos que poidan existir nestas zonas.
Por último, os operarios acometerán o acondicionamento das rotondas situadas na rúa Castiñeiras mediante diferentes labores como son a poda de palmeiras, a retirada de elementos vexetais e o seu desprazamento a un xestor autorizado para o seu posterior tratamento.
Contido relacionado
La Voz de Galicia: "Ames destina 10.400 euros a las zonas verdes de NovoMilladoiro"