O curso na Escola Municipal de Adultos comezou o día 19 de outubro e prolongaranse durante todo o curso en horario de 18:00 a 21:00 horas, os luns, martes e mércores. Nun principio este ano hai 19 persoas matriculadas. Porén a cifra de matriculados adoita a variar ao longo do ano, dado que este servizo admite a incorporación de novos alumnos e alumnas durante o curso escolar. Carmen Reboredo, técnica do departamento de Educación é a encargada de dar as clases que este ano, por primeira vez, impártense no Centro de Formación de Aldea Nova.

As clases na Escola Municipal de Adultos organízanse tendo en conta o perfil de cada alumno/a e valóranse factores que van desde a idade á formación inicial, dispoñibilidade persoal de asistencia ou a procedencia da persoa. Existe, ademais, un servizo de titoría clave á hora de preparar as probas finais.

O concelleiro de Educación e Cultura David Santomil Mosquera visitou a Escola na inauguración do curso e manifestou que "o Concello de Ames reforza este proxecto educativo que lles achega ferramentas ás persoas maiores de 18 anos para obter o título da ESO. Conseguir este título é un primeiro paso de cara á inserción laboral, necesaria para acceder a ciclos formativos e ao mercado de traballo". Ademais o concelleiro ofreceu aos alumnos/as "todo o apoio para lograr estes obxectivos, con recursos propios do Concello de Ames a disposición dos veciños e veciñas" e desexoulles moita sorte no cometido que acaban de emprender. "Nunca é tarde", destacou o concelleiro, para animar a aqueles alumnos e alumnas de maior idade que participan no curso.

O calendario da Escola Municipal de Adultos organízase en dous cuadrimestres, de outubro a xaneiro e de febreiro a xuño. Este curso hai algúns alumnos e alumnas que preparan a proba libre, para realizar na convocatoria ordinaria do mes de maio. O resto do alumnado irá eliminando os contidos cos exames parciais que se realizarán no IES San Clemente ao longo do curso. Estes contidos agrúpanse en tres ámbitos de coñecemento: Comunicación, que abrangue Lingua Galega e Literatura, Lingua Castelá e Literatura e Lingua estranxeira (inglés ou francés); Científico-tecnolóxico, que inclúe Matemáticas, Ciencias da Natureza, Física, Química e Tecnoloxía; e Ámbito social, que inclúe contidos de Xeografía, Historia, e outras materias afíns.

A matrícula está aberta todo o ano
A Escola municipal de adultos non esixe asistencia obrigatoria, e esta queda función das posibilidades de cada quen, xa que hai alumnado que compatibiliza un emprego coa formación. A matrícula permanece aberta ao longo do ano, polo tanto poden apuntarse aquelas persoas que só desexen realizar o exame final en xuño no IES San Clemente de Santiago de Compostela, malia que é recomendable a asistencia ás aulas desde o comezo do curso para ter maiores garantías de aprobar.

Todos os veciños e todas as veciñas de Ames maiores de 18 anos que desexen obter o Título de Graduado en Educación Secundaria, poden matricularse para este curso 2013-2014 no departamento de Educación, situado no Pazo da Peregrina de Bertamiráns, e nas Oficinas Municipais do Milladoiro, na rúa de Abaixo, número 10. Ante calquera dúbida poden chamar ao departamento de Educación a través do número de teléfono 981 891 476.

Contido relacionado

La Voz de Galicia: "La Escola de Adultos inicia el curso con 19 estudiantes sin título de ESO"
El Correo Gallego: "Una veintena de adultos se lanzan a por el título de graduado en Secundaria"