A localidade de Bertamiráns acollerá este venres, 4 de novembro, unha festa de Samaín, que se vai desenvolver no aparcadoiro da Telleira. O evento está organizado pola comisión de festas de Bertamiráns e conta coa colaboración de XEA (Xuntanza de Empresarios de Ames) e do Concello de Ames. O obxectivo é recadar fondos para as festas de Bertamiráns de 2023. Dita festa estaba prevista para o luns 31 e outubro, pero houbo que adiala debido ás inclemencias meteorolóxicas.

A festa comezará ás 18:00 horas co espectáculo Barullo de Nelson Quinteiro. Trátase dun espectáculo infantil de clown que aborda a cultura e a música tradicional a través dos seus instrumentos. Nesta aventura Nelson Quinteiro convértese no señor Patajullo, unha divertida personaxe que se chama así porque fai moito barullo. O obxectivo do espectáculo comeza coa teima de axudar ao seu amigo Pepe, un lindo porquiño, a atopar o instrumento que mellor vaia coa súa personalidade, estilo e tamaño.

Ás 20:30 será a quenda de Urakán, o grupo dos vocalistas Leo García e David Seara, que tamén forman parte da orquestra Finisterre. Haberá cantina, e os asistentes que acudan disfrazados entrarán no sorteo dunha cesta de carne e vexetais (doados por Carnicería Suso e Tomate más fruta) para facer un cocido. Todos os beneficios serán destinados á celebración das festas de Bertamiráns do vindeiro ano 2023.

A concelleira de Promoción Económica, Ana Belén Paz, explica que “se trata da primeira festa de Samaín de Bertamiráns e agardamos que sexa a primeira de moitas”. Ademais, pon en valor este tipo de iniciativas “porque necesitamos dinamizar o comercio e maila hostalería local. A nova comisión de festas de Bertamiráns está traballando moi ben dende a súa constitución, primeiro no programa Ames en Festas, e agora coa organización deste novo evento. De seguro que durante os próximos meses nos van a sorprenden con novas iniciativas”.

Novas relacionadas:

El Correo Gallego: "Gran festa de Samaín en Bertamiráns este venres"