Este venres a Casa da Cultura de Bertamiráns acollerá a cuarta edición no Encontro das Escolas Municipais de Música, un evento organizado pola EMMA no que se pretende crear un espazo no que compartir a paixón pola música e aprender entre o alumnado das diferentes escolas. O acto leva por nome Música na praza, e nel reuniranse arredor de 100 alumnos/as da Escola Municipal de Ames, Muros e Caldas de Reis.

O concerto dará comezo ás 19.00 horas e terá unha duración aproximada de hora e media. O grupo que abrirá o encontro será a agrupación de violín Xóvenes águilas Aga Mainska da EMMA, que interpretará “Secrets”. De seguido, haberá unha actuación de solo a piano na que se tocará a peza “Epiphany”.

Tras as primeiras actuacións por parte do alumnado da escola amesá, será a quenda das escolas convidadas. En primeiro lugar, actuará a agrupación de guitarras de Caldas de Reis e, a continuación, actuará o combo infantil de Muros, que interpretarán un mix de diferentes cancións, incluíndo un tema propio.

O encontro seguirá coa actuación do gañador do certame Quero Cantar na categoría infantil, Gael. Tamén estarán presentes as gañadoras amesás deste certame na categoría xuvenil, Emma e Candela, ámbalas dúas alumnas da EMMA.

Xa na recta final do concerto, o combo xuvenil da EMMA interpretará un mix de cancións, nas que soarán temas coñecidos por todo o mundo como “Física o química” ou “Sweet Child O’Mine”.

A penúltima agrupación en actuar será o combo de adultos da escola de Muros e, pechando o concerto, o combo de adultos da EMMA Extrema función interpretará un mix de diferentes temas.

Novas relacionadas:

El Correo Gallego: "Uns cen alumnos tocan no Encontro de Escolas Municipais de Música en Ames"

Diario de Santiago: "A Praza de Chavián, en Bertamiráns, acollerá mañá, venres 25 de abril, o IV Encontro das Escolas Municipais de Música"

AMSGO!: "A Praza de Chavián acollerá mañá, venres 25 de abril, o IV Encontro das Escolas Municipais de Música"