A concelleira de Sanidade e Promoción da saúde, Luísa Feijóo, e a técnica de Promoción da saúde, Rosana Martínez, presentaron esta mañá no Pazo da Peregrina a primeira edición da Feira da Saúde e Ben-Estar, que se desenvolverá en Ames durante toda a xornada do sábado, 10 de abril, e na mañá do domingo 11.

Os obradoiros “Pesca o teu menú” e “Un Prato con moito tino”, dirixidos a que a infancia adquira nocións de alimentación saudable abrirán a xornada os dous días de Feira. Haberá xogos a través dos que a rapazada e os maiores aprenderán como afrontar as intolerancias, como alimentarse con xeito ou que cuestión une dereitos humanos e alimentación. O coidado do corpo estará presente nos obradoiros de marcha nórdica, ioga terapéutico, xerontoximnasia, Corpo e Consciencia, Ponte en marcha e na andaina polo Rego dos Pasos que guiará o sábado, a partir das 17:30, a técnica de Medio Ambiente, Patricia Reboreda. FEGADACE proxectará nunha carpa varios documentais relacionados co dano cerebral. ANEDIA trae a súa exposición “Os Bolechas saben o que a diabetes” e a meirande parte dos relatorios estarán protagonizados por asociacións relacionadas coa saúde que decotío traballan co Concello.

“Dalgún xeito, a Feira nace para darlle visibilidade e agradecer o traballo que as distintas asociacións relacionadas coa saúde fan con nós, ao longo de todo o ano”, manifestou Luísa Feijóo, a concelleira de Sanidade, na presentación do evento. Feijóo dixo tamén que a Feira nacía con vocación de continuidade e lembrou o gran impulso que supuxo para todo o seu departamento o Premio á Calidade que recibiron recentemente: “Desde todas as actividades que programamos e desde a Escola de Saúde que creamos o pasado ano o que pretendemos é tratar á saúde como moito máis que “non enfermidade” e que eses hábitos saudables que promovemos se sigan durante todo o ano, independentemente de que se celebre o “día de” ou “a semana de”; a nosa intención é a de seguir traballando e afondando en saúde e facelo en colaboración con todas estas asociacións que van estar presentes na Feira”.

A técnica de promoción da saúde, Rosana Martínez, agradeceu tamén “a participación e a implicación das asociacións e as distintas propostas que ofreceron para o evento”. Rosana explicou que se realizarían actividades para adultos/as, nenos e nenas e outras nas que podería participar toda a familia. Matizou que as actividades físicas distribuiranse en distintos espazos polos xardíns do pazo e lembrou que para algunhas delas, concretamente para Ponte en marcha, andaina polo rego dos pasos, xerontoximnasia e ioga terapeútico hai que inscribirse con anticipación.

Aquelas persoas que desexen inscribirse nas actividades de “Ponte en marcha”, andaina polo Rego dos Pasos, xerontoximnasia e Ioga Terapeútico deberán enviar un correo electrónico a promociondasaude@concellodeames.gal, especificando a cal delas queren apuntarse. Ao pé desta nova podes consultar os PDF e cartelería coa programación de actividades e faladoiras da feira.

Novas relacionadas:

La Voz de Galicia: "Ames crea una Feira da Saúde con 17 asociaciones y dos días de actividades"

El Correo Gallego: "Bertamiráns acoge el ferial más saludable de la comarca"